Peqatigiiffiup illutaarnissaminnut aningaasanik katersuiniarnera biilinik nutaggarinnik eqqugassartalik iluatsinngitsinngitsoorpoq.
Biili eqquiniutinik 4000-nik tuniniaanikkut eqqugassanngortinneqaraluarpoq, eqquniutilli maajip naanerani juunillu aallartinnerani tuniniarneqartut iluatsissimanngillat.
Eqquniaatinik tuniniaaneq inatsisit malillugit ulluni arfineq pingasuni ingerlanneqareersoq, eqquniutillu 800-it tunineqareersut, peqatigiiffik tuniniaanerminik sivitsuiniaraluarluni qinnuteqarpoq, itigartinneqarlunili.
Peqatigiiffik sivitsuiniaraluarnerminik itigarami Politimestereqarfimmut ingerlatitseqqiivoq, tassanili aamma itigartinneqarput. Suliassarlu maanna Qallunaat Nunaanni politiit qullersaqarfiannut ingerlateqqinneqarpoq.
- Inatsisit akimmisaartitsipput, Hans Ole Petersen, angerlarsimaffeqanngitsut peqatigiiffianni Isertami siulittaasoq oqarpoq.
Tamanna iluatsissanngippat Iserta eqquiniutinik naqiterisitsinerminut akiligassaqalissaaq. Godthåb Auto Servicemiilli oqaatigineqarpoq biili eqqorneqartussaangaluaq tuniniaqqeriaannaammat peqatigiiffik biilimut akiligassaqalissanngitsoq.
- Suna tamarmi iluatsissanngippat eqquiniutinik pisisut aningaasaatiminnik utertitsiinnarnissaat tullinnguuttariaqalissaaq, Hans Ole Petersen oqarpoq.
Politimestereqarfimmiit oqaaseqartitsiniaraluaratta pisut ataasiakkaat pillugit oqaaseqartoqarsinnaanngimmat iluatsinngitsoorparput.