Biilinik aqutsiguit oqarasuaat angallatagaq atoqinagu
Biilinik aqutsiitigaluni sms’erneq imaassinnaasoq ilaasa torragissagaat, ulorianarsinnaavorli.
Imigassartorsimatilluni biilinik aqutsinerminngaanniit ulorianarnerusoq Amerikami misissuinerit takutippaat.
Inuusuttup oqarasuaatimik angallattakkamik atuiitigaluni biilinik aqutsisup qisuariarsinnaanera 70-inik ukiullip qisuariarsinnaaneranut assingusoq misissuisut paasisimavaat.
Aalakoornartumik 0,8 promille-mik aammi akoqarnerminngaanniit ulorianarnerusoq politiip Stig Svendsenip oqaatigaa.
- Aqqusinikkut angallannerup nalaani ajutoortoqarsimasoq aviisini allaaserineqaraangat ajutoorsimanermut suna pissutaanersoq ilaatigut nalornisigineqartoq saqqummiunneqartarpoq, oqarasuaatinilli angallattakkanik atuiitigaluni biilertoqarsimasoq qasseerpassuariarluni pissutaasimasinnaasoq eqqarsaatigisarpara, Stig Svendsen oqarpoq.
Biilinik aqutsiitigalutik oqarasuaatinik angallattakkanik atuisimasutut politiinit akiliisinneqarsimasut ukiuni kingullerni amerliartorsimapput, siorna 22.000-it sinnersimammassuk.
Ukioq manna kisitsit tamanna qaffariaateqassasoq ilimagineqarpoq.