Biilinik ajutoornermi arnaq inuusuttoq ajoquserujussuartoq
Nuummi aqqusinermi ippassaq unnukkut aqqarngup qeqqata missaani ajutoortoqarneratigut, arnaq inuusuttoq angisuumik ajoquserpoq. Arnaq biilinut nalinginnaasunut ilaatillugu, biilit ilaaffigisai illoqarfiup immikkoortuani Nuussuarmi biilit nermallagiaani sukkaqalutik ingerlanerminni ajutoorput kussiamilu pusillutik unillutik.
Allattoq Elisa Isaksen
oktobarip 27-at 2012 15:36
Arnaq inuusuttoq taanna peruluttunut immikkoortortami maanna uninngavoq, inuunerminilli ulorianartorsiunngitsoq, Nuummi politiinit oqaatigineqarluni.
Biilinut ajutoortunut inuusuttut sisamat ilaasimapput - tassa angutit marluk arnallu marluk, taakkunanngalu pingasut ajutoornermi ajoqusersimanngillat.
Politiit ilisimatitsissutigaat, ajutoorneq sioqqutitsiarlugu biilinik ingerlatsisup angutip sukkaqaluni bussit ingerlasut saneqqussimagai.
- Sukkavallaamik ingerlasoqarneratigut aamma aqqusernup masannera soqutiginagu sukkalisaartoqarneratigut ajutoorneq pivoq, Carl Sværd Nuummi politiineersoq KNR-imut ullumi taama oqarpoq.
