Biilinik aallarussisartut Nuummi ajornartorsiutaasut

Angut marloriarluni biilimik aallarussaminik politiit biiliinik apuinermi kingorna tigummigallarneqarpoq. Biilinik aallarussisoqartarnera Nuummi piffissami matuma ajornartorsiutaasoq politiit aamma oqaatigaat.

Allattoq Mads Pedersen

septembarip 21-at 2016 11:38

Nuummi politiit innuttaasunit biilimik aallarunneqarsimanerinik ullut tamangajaasa saaffigineqartartput, Nuup politiivini piareersimasut ittuat, Carl Sværd, KNR-imut taama oqarpoq.

Sapaatiummat unnukkut aamma taama pisoqarpoq. Angut 20-t sinnilaarlugit ukiulik aalakoortilluni Nuup ilaani Nuussuarmi biilimik pisoqqamik Toyota Hiluximik aallarussivoq, politiinillu unitsinniarnermini politiit biilii aporpai. Angut kingorna politiinit tigusarineqarpoq.

- Inatsit tunngaviusoq naapertorlugu killisiorneqarpoq politiinillu ulluni 25-ni maanna tigummigallarneqarluni, Carl Sværd oqarpoq.

- Angut pineqartoq sapaatit-akunnerata siuliani assingusumik pisoqarnerani politiit biiliinik apuisimasoq aamma paasineqarpoq, Carl Sværd politiineersoq oqaluttuarpoq.

Politiilli unnerluussisussaatitaasullu taamani naliliipput inatsit tunngaviusoq naapertorlugu killisiorneqarnissaanut tunngavissaqanngitsoq. Angut iperagaavoq akuerineqaranilu atuisimasutut unnerluutigineqarnera attatiinnarneqarluni.

Angut inuusuttoq allatigut pinerluttuliornerminut tunngatillugu misiligummik iperagaaqqasoq aamma paasineqarpoq. Politiit biiliinik marlunnik ajoqusiisimasutut inuinnaallu biiliinik marlunnik ajoqusiisimasutut taarsiissuteqarluni akiliisinneqarnissani naatsorsuutigisinnaavaa.

Aamma atuaruk Tillinniat inuusuttut tigusarineqartut

Politiit biilinik aallarussisoqarsimaneranik maannakkorpiaq amerlasuunit saaffigineqartarput. Biilillu pisoqaanerusut aallarunneqakkajuttarput.

- Aallarussisartut aalajangersimasuunissaat ilimanarpoq, Carl Sværd oqarpoq.

- Biilinik aallarussisartut matuersaatit atornagit biilinik aallarussinissartik ilikkarsimavaat. Aammali biilip matuersaataanik tillittoqarneratigut ilaatigut aallarussisoqartarpoq, Carl Sværd taama oqarpoq.

Biiliutillit aquutikkut parnaarsaammik atuinissaannik imaluunniit biilimik alarmilersornissaannik politiit kaammattorpaat.

Ajornartorsiutillu aaqqiivigineqarnissaanut innuttaasunit saaffigineqartarnissartik politiit pisariaqartippaat.

- Inuit najugaqarfimmik eqqaanni pasinarsinnaasunik unnukkut takusaqaraangamik politiinut saaffiginnissinnaapput. Ikioqatigiikkutta ajornartorsiutit aatsaat aaqqiivigisinnaavagut, Carl Sværd taama naggasiivoq.