Biilikut iginnissaat ajornartorsiutaasarpoq
Biilikut umiatsiakullu igitassanngortarnerinut akileraartalernissaq piumasaraarput. Taama oqarput kommuneqarfinni teknikkikkut pisortat, igitassanut akiligassat annertuvallaarnerinik qatsusseqqasut.
Ukiut tamarluinnaasa biilit umiatsiallu atorsinnaajunnaartut igitassanngortinneqartarput, taamaasillunilu kommunit aningaasartuutissaqarnerulersarlutik.
Kalaallit Nunaannut biilit eqqunneqartartut amerligaluttuinnarput, ippassarlu oqaluttuaraarput 2001-miit 2005-ip tungaanut nuna tamakkerlugu biilit eqqussuunneqartartut 17 procentimik qaffariarsimasut.
Biilerli nutaaq tikisinneqaraangat, biilikoq alla nunatsinniit aallarunneqartarpoq.
Biilillu atorsinnaajunnaarsimasut, inuit illumik silataannut inississimagaangassuk, kommunit qanoq iliuuseqarpiarsinnaaneq ajortut, kommuneni teknikkeqarfimmi pisortat peqatigiiffianni siulittaasoq, Ummannameersoq Niels Mønsted oqarpoq:
- Illut silataannut biilikut umiatsiakulluunniit inissinneqarsimagaangata, teknikkeqarfimmiit iliuuserisinnaasarput killeqartarpoq. Immaqa piginnittoq isumaqarsinnaavoq biilikoq umiatsiakorluunnit suli kusanartoq, amerlanertigulli saniliusut isumaqartarput isigisaq kusanaatsuusoq, Niels Mønsted oqarpoq.
Ajornartorsiulli taannannanngilaq. Aamma mingutsitsineq ajornartorsiutaasarpoq, ilaatigullu aamma umiatsiakunik snescooterikunilluunniit piginnittut taarsiffigeqqusarput, umiatsiakui snescooterikuiliinniit kommunimit iginneqarsimagaangata, Niels Mønsted oqarpoq:
- Biilikut ilaannik piigaqarsimatilluta misiginikuusatta ilaat tassaavoq, inuttaasup sunaaffa biilimik pisinermini akiligassani suli naammassisimanngikkaa, eqqartuussivilersuussisoqarmallu, allatut ajornartumik akiitsuusup sinnera kommunip akilertariaqarsimavaa, tassa ajornartorsiutit taamaattut naammattoorsinnaasarpagut, Niels Mønsted oqarpoq, nangillunilu: - Inuit biilikutik umiatsiakutilluunniit aningaasannassutigilaarlugit igissinnaasartuuppatigit, immaqa ajornartorsiutit taamaattut pinngitsoortsinneqarsinnaagaluarput, aammalu isigisat kusanaatsut illoqarfinni takuneqarsinnaasut immaqa ikilissagaluarput. Aamma angallatit biililluunnit nunatsinnut eqqunneqartillugit akileraarutit ilaat kommunenut tunniunneqarsinnaapput, taamaasilluni biilimik umiatsiamilluunniit igitassaqalernermi inuttaasup akissarsiassatut, aningaasat taakkua atorneqarsinnaallutik, Niels Mønsted naggasiilluni oqarpoq.
