Biili qaartinniagaq suli qaanngitsoq nassaaraat
Pakistanimi Talibanit New Yorkip qeqqani biilimik qaartitsiniartuunerarlutik nalunaaruteqartut muslimit ingasattajaarniat nittartagaani taama nalunaaruteqartoqarnerarlugu, Danmarkip Radiua ilisimatitsivoq.
Aqqusinermi tuniniaasartup biiliminngaanniit pujortoqarnera politiimut oqaatigimmagu tamanna paasineqarpoq.
Biili Broadwayip 45th Streetillu naapiffianni, motoorii ingerlatiinnarlugit unitsinneqarsimavoq, ajutuulernermilu qullii ikittaartinneqarlutik. Illoqarfiup ilaa tamanna nuannaarniartarfippassuaqartutut isiginnaartitsisarfippassuaqartutullu ilisimaneqarpoq.
Gassit puui dunkiusat pingasut, beziinat dunkit marluk, qummoroortartoq nalinginnaasoq ataaseq, nalunaaquttat batteriillit marluk ledningillu, biilimi nassaarineqarput.
Tamatuma kinguninnguagut Times Square-mi biilip uninngaffiata eqqaaniittut inuit politiinit qimagussortinneqarput. Qaartartorlu biiliniittoq qaanngitsoorluni.
Muslimit ingasattajaarniat nittartagaanni nalunaarutigineqarpoq, New Yorkip qeqqani qaartartoq qaartinniagaq tassaassasoq "musliminik marlunnik Irakimi toqutaasunik" akiniussilluni iliuuseriniagaq.
Aviisimi New York Timesimi ilisimatitsissutigineqarpoq, politiit qaartartunik immikkut ilisimasallit biili "pikkorluttunit" qaartinniagaasutut taagaat. Tassami immikkut ilisimasallip naliliinera najoqqutaralugu, biili qaarteriarneqarsimasuuguni qaarnani ikuallannerusimassagaluarmat.
Biilip normuisa allassimaffiat tillitaavoq, kikkullu biilimik qaartitseriartuunersut ilisimaneqarani.
Assiliissuterpassuit illoqannginnersami tamaani nakkutilliissutitut atorneqartut assilisaat politiinit maanna misissorneqaleruttorput. Taamaalilluni biilimik inissiissut takuneqarsinnaanissaat neriuutigineqarmat.
