Biili innaallagiatortoq kalaallisut atserneqartoq

Biili innaallagiatortoq nutaaq Nanoq-mik atserlugu biililiortarfimmit Lynximit ilisariteqqammerneqarpoq.
decembarip 15-at 2009 07:50

NANOQ atorlugu biilissaagut?

Ilaqutariit ilaanni sapaatikkut ualikkut immaqa taama oqartalissapput.

Biili, ilaqutariinnut immaqa meeralinnut naatsorsuussaq, ulluni makkunani nittarsaanneqaleruttorpoq, soorlulu immaqa naluneqanngitsoq, silap pissusaata allanngoriartornera pissutigalugu Københavnimi ulluni makkunani ataatsimeersuartoqaleruttorpoq, eqqumiigineqassagunanngilarlu biili taanna innaallagissamoortoq atserneqarmmat, NANOQ.

Biilimik aatsaavissuaq kalaallisut atsiisoqarpoq, biililiorfiullu LYNX-ip, biilimik innaallagissamoortumik sanasup, biilit qullii tunorliit nannup isigaatut ilusilersimagujai.

- Biilip innaallagissamoortup NANOQ-mik atsernissaanut aalajangiussinitsinnut pissutaavoq, biilinik silaannarmik mingutsitsinngitsunik, tassa CO2-mik aniatitsinngitsunik, atugaqalernissaq siunniunneqarnikuummat, silaannarmillu mingutsitsinngikkutta nannut aamma uumaannarsinnaassapput, biililiorfimmik Lynn Cars-imik piginnittoq, Brian Hoehl, oqarpoq.