Biili inaallagiamik ingerlatilik Nuummut annguppoq
Biilinut ikummatissanik atuinngitsunut naalakkersuisut akitsuusersuiunnaarmatali biilit inaallagiamik ingerlatillit nunatsinnut eqquneqartut siullersaraat.
Nuummi Deres Auto biilimik Mitsubishimeersumik tikisitsisuuvoq.
- Siullermik biili tamanut saqqummiunneqassaaq tassanilu misilinneqarsinnaassalluni. Biilillu innaallagiamik ingerlatillit qanoq soqutigineqartiginerat aallaavigalugu taakkuninnga tuniniaanissarput aalajangiiffigissavarput, Kurt Pedersen tuniniaanermut pisortaq oqarpoq.
Nukissiorfiit biilinik innaallagiamik ingerlatilinnik marlunnik qaammatip tulliani tikittussanik pisisimavoq. Taakku brintimik katersukkamik innaallagissiuuteqarlutik misiliutitut ingerlanneqassapput.
Biilit innaallagissamik ingerlatillit Issittumi manna tikillugu annertunerusumik atugaanngillat. Issimik silaannarmillu tarajumik annertuumik akulimmik bateriit biilillu qanoq sunnerneqartarnerisa ilisimaneqannginneranik tamanna tunngaveqarpoq.
Nukissiorfiit pisortaat Svend Hardenberg siornatigut oqaaseqarnikuuvoq Nuuk tassaasinnaasoq biilinut brintimik pilersuisut nunarsuarmi illoqarfinni pigaarnerni siullersaat.
Eqqussuinermi akitsuutit peerneqarnerat ukiuni tullerni sisamani atuuttussaq 1. Januar 2014-imi atorunnaassaaq.
Akitsuutit peernerinut atatillugu naalakkersuisut oqarnikuupput biilit pillugit ineriartortitsineq misiliivimmi malinnaaviginiarlugu, taamaalilluni misiliineq qaangiuppat inatsisartut nalilersuinissaminnut tunngavissaqaqqullugit.
