Biilerpassuit Nunatta karsianut iluanaarutaagaluartut avatangiisinut mingutsitseqaat

Danmarkimi biilinik tunisisarneq appariartupilooraluartoq Nunatsinni iffiukkatut qalarlaatut tunisaapput. Nuummi biilit 3000-t missinginiipput. Nunatta karsiata iluanaarutigilluartarpai, 2009-mullu aningaasanut inatsisissami naatsorsuutigineqarpoq 52 millioni koruuninik iluanaarutaassasut. Biilerpassuilli CO2-mik aniatitseqaat.
Allattoq Mads Lynge
maajip 16-at 2009 16:57

Biilit motoritik ikeqqatillugit uninngaannartut Nuummi takussaaqaat. Nuummi politiit oqaatigaat maannakkorpiaq Nuummi biilit 2840-sut, aqquserngillu 70 kilometerisut isorartutigiinnarput.

Biilerpassuit sumummita atorpat? Nuummi biilit uninngaartarfiini biiliutillit ullut tamaasa qanoq isorartutigisumut ingerlasarnersut apersorpavut, Toramillu atilik ima akivoq:

- Suliartuleraangama biilertarpunga, soorunami aamma angerlaleraangama. Kisianni aasakkut silagikkaangat pisunnerusarpunga, pisiniarfiliaraangamali biilertarlunga, Tora oqarpoq.

C02-mik aniatitseqaat. Risømi uuttortaasup Kaj Jørgensenip nalilerpaa biili nalinginnaasoq kilometerimut C02-mik 180 gramimik aniatitsisartoq. Nunatsinnili naatsorsuutigineqarsinnaavoq issittumiikkatta biilit sakkortunerusunik motooreqartariaqarnerat, issinneranilu motoorisa ikumatiinnartarneri.

Oqarutta Nuummi biilit tamarmik agguaqatigiissillugu ullormut 40 kilometerit ingerlasaraat, naatsorsorsinnaalerparput Nuummi biilit katillutik ullormut C02 20 tons aniatittaraat. Assigaa Air Greenlandip timmisartorsuata Airbusip Atlantikoq qulaallugu aqqutaata affaanik timminera.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq