Ataatsimiititaliaq: Biileqartitaanermut malittarisassat allanngortinneqassapput

Namminersorlutik Oqartussani atorfimmut atatillugu biileqartitaanermut malittarisassat allanngortinneqartariaqarput, Inatsisartut Kukkunersiuinermut ataatsimiititaliaat taama isumaqarpoq. Sipaarniarnerunissaq pisortallu aningaasaataannik atornerluisoqannginnissaa malittarisassatigut annertunerusumik qulakkeerniarneqassaaq.

Inatsisartut Kukkunersiuinermut ataatsimiititaliaat Nunatta Karsiata 2017-imut Naatsorsuutaanut oqaaseqaatimini taama allappoq. Orsersornissamut kortip, naalakkersuisuusimasumut Doris J. Jensenimut tunniunneqartup, angallatip orsersornissaanut 2017-imi atorneqarsimanerata kingunerisaanik taama nalunaaruteqartoqarpoq.

Naalakkersuisut atorfimmut atatillugu biileqartitaanerannut, tamatumunngalu atatillugu biilimik allamut atukkiussisinnaanermut erseqqissunik ullumikkut malittarisassaqannginnera ataatsimiititaliap oqaaseqataani aamma atuarneqarsinnaavoq.  

Atorfimmut atatillugu biileqartitaanermi aningaasartuutissanut killeqartitsisoqannginnera ataatsimiititaliamit aamma uparuarneqarpoq. Tamannalu allanngortinneqartariaqarpoq, biilimik orsersornissamullu kortimik siunissami atornerluisoqannginnissaa qulakkeerumallugu, Kukkunersiuinermut ataatsimiititaliaq taama allappoq.

AAMMA ATUARUK Doris J. Jensen Naalakkersuisunit tunuarpoq

Doris J. Jensen (S) ilinniartitaanermut, kultureqarnermut, ilisimatusarnermut ilageeqarnermullu naalakkersuisutut oktobarip qaammataani tunuarpoq. Atorfimminut atatillugu biilerisami inummit siornatigut inoqutigisami ilaanniissimasumit atorneqarnerata, pineqartullu biilip orsersornissaanut kortip Namminersorlutik Oqartussanit tunniunneqartup angallatinut orsiisarfimmi atuisimanerata kingunerisaanik tunuarpoq.

Kukkunersiuinermut ataatsimiititaliaq naapertorlugu Doris J. Jensen biileqartitaanermut malittarisassanik unioqqutitsisimanngilaq, biilip atornissaanut killiliisoqanngimmat. Orsersornissamulli kortip naalakkersuisutut kisimiilluni atuisinnaatitaalluni erseqqissaatigisimasariaqaraluaa, ataatsimiititaliaq isumaqarpoq.

AAMMA ATUARUK Benzinamut akiliutissamut suli malittarisassaqanngitsoq

Aammattaaq atorfimmut atatillugu biilimik tunniussinermi ullumikkut allakkatigut isumaqatigiissuteqartoqartannginnera ataatsimiititaliap eqqarsarnartoqartippaa.

Aningaasaqarnermut Nunanilu Avannarlerni suleqatigiinnermut naalakkersuisup Vittus Qujaukitsup (NQ) atorfimmut atatillugu biileqartitaanermut malittarisassat misissuiffiginiarlugit siornatigut nalunaarutigaa. Malittarisassallu pisortat aningaasaataannik sipaarniarnerunissaq anguniarlugu allanngortinneqarnissaat Kukkunersiuinermut ataatsimiititaliamit naatsorsuutigineqarpoq.

AAMMA ATUARUK Erik Jensen overtager efter Doris J. Jensen

 

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat