Biibilimit aallaaveqartut angerlarsimaffippassuarni assiliaatigineqarput
Ajoqersuiartortitat kalaallisut oqalussinnaannginnamik kristumiuussutsip oqariartuutaa assit atorlugit ajoqersuussutigineqartarpoq. Biibilimit pisunit assilialiat kalaallinit pingaartinneqarput, taamatut oqaluttuarpoq, upperisarsiornermik ilisimasalik Kathrine Kjærgaard, assilialiat pillugit ilisimatusaatiminik tallimanngormat Ilisimatusarfimmi soraarummeertoq. Biibili aallaavigalugu assilialiat qinunermi atorneqartarlutik, biibilip oqaluttuassartaanik meeqqat ilinniartinneqartarnerinut imaluunniit angajoqqaanit ileqqoq kingornunneqartarluni.
Kathrine Kjærgaard ukioq 2003-mi 2004-milu suliaminut atatillugu paasisassarsiorluni Kalaallit Nunaanni inoqarfiit tamaasa angallavigivai, apeqqutinillu akisassanik nassiussuilluni. Apeqqutit immersugassanngorlugit akisassat 250-it nassiussuunneqarput - taakkunannga 75-it akissuteqarlutik, tassalu apeqqutit nassiuussunneqartut pingajorarterutaat akineqarput. Kathrine Kjærgaard tupaallaatigisaanik inuusuttut amerlasuut jiisusip maariallu assinginik assiliaateqarput. Assilissat meeqqanut ernuttanullu oqaluttuarineqartarput, ullaakkut unnnukkullu qinunermi atorneqarneqartarlutik, aammalu meeqqat unnukkut oqaluttuunneqartarput jiisusip paarimmatikannilaangassanngitsut , Kathrine Kjærgaard oqarpoq. Angerlarsimaffinut iseraanni imaluunniit nalunngisanut ilaquttanulluunniit iseraanni takuneqartarput, jiisusip ajoqersuiartortitaasalu nerliiviliarnerat kingulleq assiliaatigigaat, tassuunalu takussutissaavoq, amerlasuut kristumiuussutsimik aallussisuusut.
Naneruutit aamma upperisarsiorpaluttunik assiliartaqartut pisiarineqarluartarput, taakkua angerlarsimaffinni ikumatinneqartarput, aammalu ilerrit naneruuserneqartarnerini naneruutit assiliartallit naneruutigineqartarlutik, soorlu adventit sapaataasa siullianni ilerrit naneruuserneqartarlutik, Kathrine Kjærgaard oqaluttuarpoq.