BIG ajugaavoq
Inatsisartut siulittaasuata Josef Motzfeldtip, aningaasaateqarfimmut imminut pigisumut, Nuummi Nunatta Eqqumiitsulianik Saqqummersitsivissaanik pilersitsinissamik suliniuteqartumut aamma siulittaasuusup, Nuup Rådhusiani ippassaq tamanna saqqummiuppaa.
Illussanik titartaasarfiit arfinillit nunani avannarlerneersut siunnersuuteqaqquneqarsimapput, tassalu ajugaatinneqarlutik illussanik titartaasartut BIG-mik taaguutillit, uannga naalisagaasut Bjarke Ingels Group. BIG tassaavoq Danmarkimi illussanik titartaasarfiit ukiuni kingullerni ingerlalluarnersaat, Danmarkimi nunarsuatsinnilu sumiiffinni arlalinni nutaanik sanaartornernik maluginiarneqarluartunik suliaqartarsimasut.
Nunap ilaa eqqumiitsulianik katersugaasiviliorfigineqartussaq Kommuneqarfik Sermersuumit aalajangiunneqarsimavoq, taanna Nuummi Tuapannguani isikkivigissumi inissisimassaaq, tassa eqqumiitsulianik takuniaasut Nuup Ikersuanut isikkivik takusinnaassagamikku.
Eqqumiitsulianik katersugaasiviup siunertaraa, Nunatsinni eqqumiitsuliat pitsaanersaasa takutinneqarsinnaanissaat, taakku naggueqatigiit eqqumiitsuliaannik ilaqassapput kiisalu nunat inoqqaavinut Nunatsinnullu attuumassuteqassallutik.
Nunatsinni Eqqumiitsulianik Saqqummersitsivissaata qaqugu sananeqarnissaa suli aalajangiunneqanngilaq.
