Trumpip peqqussutaata januaarip ulluisa 26-ianni atuutilertussatut peqqussutigineqartup atuukkunnaarsinneqarnissaa, Bidenip ingerlaannartumik allanngortippaa. Assi: Nicholas Kamm/AFP/Ritzau Scanpix

Bidenip europamiut USA-mut angalaqqusaajunnaarsikkallarai

Europap ilarujussuanit Brasiliamiillu USA-mut angalaqqusaajunnaarsitsigallarnerit, Trumpip atuutsikkunnaassamaaraluarpai. Bidenip tamanna allanngortippaa.

USA-p præsidentiata Joe Bidenip USA-mi innuttaassuseqanngitsut Europap ilarujussuanit, Danmark nunanut taakkununnga ilaalluni, Brasiliamiillu USA-mut angalaqqusaajunnaarsikkallarpai.

USA-p præsidentiata Washingtonimi illorsuanit unnuaq taama nalunaarput.

Coronavirusip tuniluutilertunnginnissaa pillugu præsidentinngorlaap iliuuserisaanut tamakku ilaapput.

Bidenip inunnut Sydafrikamiissimasunut tamanna ataasinngornermi aamma atuutilersinniaraa ilimagineqarpoq. Biden coronavirusi allanngortoq Sydafrikameersoq USA-mut siaruaatileqqunagu taamaaliorniarpoq.

AAMMA ATUARUK Joe Bidenip USA-mut tikittut angerlarsimaannarnissaannut piumasaqaatit atulersikkai

Joe Biden præsidentinngorami coronavirusip siaruaatilertunnginnissaa pillugu maleruaqqusanik sukaterineq suliaasa siulliit ilagaat.

Innuttaasut naalagaaffiup illuinut pigisaanullu orniguttut USA-mullu angalasut qanermut pinngitsooratik assiaquteqartarnissaat taakkununnga ilaavoq.

Europap ilarujussuanit Brasiliamiillu USA-mut angalaqqusaajunnaarsitsigallarnerit Donald Trumpip præsidentiujunnaajartulernermini atuutsikkunnaaraluarpai.

Trumpip peqqussutaata januaarip ulluisa 26-ianni atuutilertussatut peqqussutigineqartup atuukkunnaarsinneqarnissaa, Bidenip ingerlaannartumik allanngortippaa.

Coronavirus tuniluutilermalli USA-mi inuit 25 millionit sinnerlugit coronavirusimik tunillanneqarsimapput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat