Biden naartuissinneq pillugu: - Eqqartuussiviit qullersaat ”nakkutilliisinnaanngitsoq”
- Eqqartuussiviit qullersaat ”nakkutilliisinnaanngitsoq” amerikamiunik kiffaanngissusiiaassanngilaq.
Naartuersissinnaanermut pisinnaatitaaffeqartitaanissaq pillugu peqqussummik USA-p præsidentia Joe Biden atsiulerami taama oqaasertaliivoq.
Præsidentip peqqussut atsiugaa, amerikami peqqinnissamut naalakkersuisoqarfimmut erseqqissaassutaavoq, taannalu ilaatigut imaqarpoq; amerikami peqqinnissaqarfiup nakorsaatit naartorisamik kataasitsisinnaasut nakkutiginerussagaat.
- Eqqartuussiviit qullersaat ”nakkutilliisinnaanngitsoq” ingasaassiniartunillu Det Republikanske Partiinik suleqateqartut suleqatigisinnaanngilagut, taamaaliorutta kiffaanngissusiagaallutalu nammineq inuttut naalakkersuisoqarsinnaassuserput arsaarneqassaaq, Biden oqarpoq.
- Inuiaqatigiit qinigaat pilersitsisut ingasaassiniallu.
Eqqartuussiviit qullersaat allanngortitsisoq
Taama pisoqarpoq, USA-mi eqqartuussiviup qullersaqarfiata juunip 24-iani amerikami naalagaaffiit ilaannut tassa statit ilaannut ammaassimmat naalagaaffiit namminneerlutik aalajangertalertussanngormassuk naartuersinnissamut killiliisinnaanngortinneqarlutilluunniit naartuersinnissamut inerteqquteqarsinnaatitaalernerat.
Tassalu imaappoq amerikamiut eqqartuussiviisa qullersaata amerikami 1973-mili naartuersissinnaanermut pisinnaatitsineq juunimi atorunnaarsippaa.
Bidenip peqqussummik atortuulersitaata aamma illersussavaa arnat peersitserusullutik amerikap statiisa ilaannukarlutik peersitsiartorsimanertik pissutigalugu pillarneqaratarsinnaasut illersorneqarnissaat.
Naartuersissinnaanermut pisinnaatitsissut sukkanerpaamik atuutileqqissappat, kongressimi annertuumik tamat oqartussaaqatigiinnerat anguneqaqqaartariaqassaaq, nutaarsiassaqartitsivik Reuters naapertorlugu Joe Biden oqarpoq. Taamaaliortoqareerpammi aatsaat inatsisiliortoqarsinnaavoq.
- Tamanna neriuutigeqaara, arnat eqqartuussivimmiit oqarsinnaatitaaffiiarneqartut annertuumik taasinikkut sunniuteqarniartariaqassapput, taanna erseqqissaavoq.
