Bibi Chemnitz rådhusimi torrallaasoq

Kalaallit atisanik ilusilersuisartoq tumaasamasaq, Bibi Chemnitz, Københavnimi sapaatit-akunneqartitsinera atisanik saqqummersitsinermut atatillugu Københavnip Rådhusiani ullumi atisaliaminik takutitsivoq.
Allattoq mlk, Simon Uldum
januaarip 31-at 2014 10:13

Bibi Chemnitz sapaatit-akunnerani atisanik saqqummersitsinermut atatillugu takutitsinerni pingaarnerni peqataasussatut pingajussaanik toqqagaasimavoq, atisanillu ilusilersuisartut pikkorinnerpaat kisiisa takutitsinissamut toqqagaasarput.

Atisanik ilusilersuisartoqatigiit Bibi Chemnitzip David Røgildillu Københavnimi sapaatit-akunnerani atisanik saqqummersitsinermut atatillugu takutitsinissaannut inuit 400-it isiginnaariartuupput. Taakku ilagaat Marie Hugsted, annoraaminermik mersornermik ilusilersuinermillu ilinniartitsisuusoq.

- Atisaliami atoruminartuunissaannik pingaartitaqarnera nuannarisorujussuuara. Kalaallit Nunaanni ukiup affaani sulinikuuvunga, pisinnaasaata takussallugit assut pissanganartippara, kisianni ersarinnerutinneqarsinnaagaluarput, Marie Hugsted oqarpoq.

Aappariit isiginnaartitsisartut Nukâka aamma Nicolaj Coster-Waldau aamma isiginnaariat akornanniipput, Nukâka Coster-Waldauillu takutitsineq alutorsaatigilluarpaa.

- Qanoq inuusutsiginersoq eqqarsaatigissagaanni, atisalia kusanarluinnarput alutornaqalutillu. Pingajussaanimmi maani takutitsivoq. Tamanna imaaliallaannarluni anguneqarsinnaanngilaq, Nukâka Coster-Waldau oqarpoq.

Takutitsinerlu naammassimmat Bibi Chemnitz oqiliallassimaqaaq.

- Ingerlalluartutut nalilersinnaavara. Piareersarnissamut piffissaqarluarpugut. Oqiliallaqqaqaanga. Ullunimi kingullerni atisat takutitsisussanut naleqqussarlugit allallu piareernissaat ulapputigivagut, Bibi Chemnitz oqarpoq.

Bibi Chemnitz suleqataalu David Røgild Parisimi arnanut sapaatit-akunnerani atisanik saqqummersitsinermut Capsulemut februaarip naanerani aamma peqataassapput.