Bhutto Pakistanimut utilerunarpoq

Pakistanimi ministeriunerusimasumik allamik kingumut qaammatip tulliani oktobarip ulluisa 18-ianni angerlarniartoqalerpoq.

Pineqartoq tassaavoq arnaq ministeriunerusimasoq Benazir Bhutto, 1999-imili Dubaimi Londonimilu qimaaqqasimasoq.

Bhutto nunaminut oktobari qiteqquppat tummariarpat, qanoq pisoqarnissaa nalunarluinnarpoq, tassami peruttulerami 1990’ikkunni unammillertigisimasaa Nawar Sharif ataasinngormat Pakistanimut uteraluartoq, nalunaaquttap akunnerini sisamaannarni timmisartoqarfimmeereersoq maanna præsidentiusumit Musharrafimit anisitaavoq.

Benazir Bhutto Londonimut uteqqiinnassanerpa, imaluunniit Musharrafip illersortissamisut Pakistanimeeqquinnassanerpaa. Apeqqutit taakku ulluni makkunani oqallisaaqaat.

Musharraf – Sharif-imik anisitsereernermi kingorna Pakistanimi sakkutuut qullersaattut præsidentitullu najummassimanartorsiulerpoq.

Nawar Sharif Saudi Arabiami qimaaqqasoq Benazir Bhuttotulli Tuluit Nunaanni qimaaqqasumit nuimatigisimanngikkaluarluni, Bhuttomit parnaarussaaratarsinnaasumit ulorianartorsiortiginngilaq. Arnaq Benazir Bhutto 1990-ikkunni ministeriunerugallarami peqquserluuteqartarsimanerarneqarpoq, nunaminullu uteqqikkaluaruni tigusarineqariaannaalluni.

Qaammatinili kingullerni arlalinni Bhutto-p præsident Musharraf oqaloqatigisarpaa, ministeriuninngoqqinnissani pillugu. Taamaattoqassappat Bhuttop piumasaraa Musharraf præsidentitut ingerlaqqissaguni sakkutuut qullersaattut tunuassasoq.

Ajornartorsiuteqarporli. Pakistanimi nunamik ingerlatsinermut inatsisit malillugit qinikkat qinigaaffinni annerpaamik marlunni atuussinnaatitaapput, tamannalu Bhutto-p Musharrafillu naammassereerpaat. Taamaattumik Pakistanimi ministeriunertut præsidentitullu suleqatigiilissagunik tunngaviusumik inatsisit allanngorteqqaartariaqarpoq.

Benazir Bhuttop partii tunuliaqutigisaa Pakistanimi partiini annersaavoq, taamaattumillu nunamik aqutsisuuleqqissaguni Musharrafip præsidentiuinnarnissaanut tapertaalluassaaq.

Tusarfiit aamma qularinngilaat, Bhutto-p peqquserluuteqarsimasutut unnerluutigineqarnera arlaatigut iliornikkut taamaatitiinnariaassasoq.