Per Bethelsen: Palle-p akissutaa naammaginanngilaq

Inatsisartut Aningaasaqanermut Ataatsimiititaliaa kiisami Naalakkersuisunit Air Iceland pillugu akineqarput, ilaannakuusumilli. Apeqqutit nassiussat arfineq marluk ilaat marluinnaat akineqarsimapput, tamannalu naammaginanngitsoq Aningaasaqarnermut ataatsimiititaliap ilaasortaasa ilaat, Per Berthelsen (S) oqarpoq.
marsip 10-at 2011 14:55

- Akissutit nassiunneqartut malillugit takusinnaavara Air Icelandimut isumaqatigiissut pillugu oqaaseq kingulleq suli oqaatigineqanngitsoq, Per Berthelsen naqissusiivoq.

Aningaasaqarnermut Ataatsimiititaliami ilaasortap Siumumeersup aamma oqaatigaa, Aningaasaqarnermut Naalakkersuisumit Palle Christiansenimit, Aningaasaqarnermut Ataatsimiititaliaq akissummik ullumi tigusaqarsimasoq. Tamanna pivoq ulluni 15-ni utaqqereernerup kingorna.

Akissutilli naammaginagit Per Berthelsenip aamma Finn Karlsenip, tamarmik Siumumeersut, oqaatigaat.

- Takusinnaavara apeqqutitta arfineq marluk itisilerneqarnissaannik kissaatigisagut nassiussagullu tamarmik akineqarsimanngitsut, marluinnaalli naammaginanngilluinnartumik akineqarsimallutik.

Apeqqutit suut naammaginanngitsumik akineqarsimanersut Per Berthelsenip maanna oqaatigisinnaannginnerarpai, sulimi Naalakkersuisut siulittaasuannit, Kuupik Kleistimit akissutinik tigusaqarsimannginnamik. Taakkulu tiguneqariarpata Aningaasaqarnermut Ataatsimiititaliamit suliarineqarumaartut Per Berthelsenip naatsorsuutigaa.

Aningaasaqarnermut Ataatsimiititaliap siulittaasorisimasaa, Naaja Nathanielsen, Inuit Ataqatigiit, Radioaviisimut februaarip 22-anni ima oqarpoq:

- Air Icelandimut tunngasumut apeqqutitta akineqarneri ima naammaginngitsigaagut, aammaarluta Naalakkersuisut siulittaasuannut Aningaasaqarnermullu Naalakkersuisumut allagaqaqqittariaqarsimalluta akissutinik naammagisinnaasatsinnik qinnuvigalugit. Tassami pisoq iluamik qulaajarneqarsimasorinnginnatsigu, Naaja Nathanielsen oqarpoq.

Allakkat nassiunneqarput februuarip 23-anni.

Tamassuma pinnginneranni Aningaasaqarnermut Ataatsimiititaliap Naalakkersuisunut ilaasortat marluk, Jens B. Frederiksen aamma Palle Christiansen tusarniaaffigaat. Tassalu tamassuma kingorna Naalakkersuisut ataatsimiititaliamit isornartorsiorneqarput piumaffigineqaraluarlutillu, Air Icelandimut isumaqatigiissut atorunnaarseqqullugu.

Aningaasaqarnermut Ataatsimiititaliap siulittaasua, Olga P. Berthelsen oqaaseqartinniaraluaratsigu iluatsinngilarput.