Per Berthelsenip suleqateqarnissani orniginartinneruaa
Attaviitsuujuaannassanerluni? Per Berthelsen ima akivoq:
- Tamanna kajungerisarinngilara. Suleqateqarnissaq pillugu oqaloqateqarnissaq aqagu ammaanniarpara. Soorunami immaqa oqartoqarsinnagaluarpoq attaviitsutut aallarteriarlunga qinersisikka taama amerlatigisut tunuliaqutaralugit katerseqqissinnaallunga, kisianni tamanna kissaatiginngilara. Partiit Kalaallit Nunaanni piusut naammarujussuarput. Demokraatit massakkut ingerlasut tunngavigalugit oqartariaqarpunga Demokraatitut taagorunnaarluni allatut taaguuserluni ingerlassappat akuerineqarsinnaagaluartoq, Per Berthelsen oqarpoq.
Inuit Ataqatigiit suleqatigisinnaanissaat Per Berthelsenip periarfissaasoraa piukkunnartinnerpaajullugulu. Erseqqissaatigaali oqaloqatigiinnerit suli aallartinneqanngitsut saaffiginnittoqanngitsorlu.
Inuit Ataqatigiit siulittaasuat Kuupik Kleist oqarpoq Demokraatit iluminni aaqqiagiinngissuteqarnerannut akuliunniaratik, Demokraatit ataatsimeersuareerpata aatsaat isummertoqarnissaa oqaatigalugu. Kuupik Kleist nangilluni ima oqarpoq:
- Taassuma saniatigut Demokraatinut tunngassuteqartunik Inuit Ataqatigiinninngaanniit annertunerusumik oqaasissaqanngilagut, taamaallaalli oqaatigerusuppara Kangia-kitaani kommunalbestyrelsissami ikaarsaariarnermut ataatsimiititaliami suleqatiginnerput attanneqassasoq, aamma taanna naapertorlugu sulineq ingerlaannassasoq qanorluunniit Demokraatini pisoqaraluarpat, Inuit Ataqatigiit siulittaasuat Kuupik Kleist oqarpoq.
