Berthelsenip, Storchip Lyngellu atuakkiaat franskisuunngorlugit saqqummersinneqalersut
Kalaallit atuakkiaat arlallit Montrealimi saqqummertussanngorput, atuakkallu pingasut Quebecip Universitetianit Montrealimiittumit aappaagu marsip qaammataa nallertinnagu saqqummersinnissaat pilersaarutigineqarpoq.
Allattoq Marianne Stenbæk, Montreal, Canada
novembarip 23-at 2015 04:31
Aaqqissuisup professor Daniel Chartierip KNR-imut oqaatigaa inuit Kalaallit Nunaannik soqutigisallit kalaallit atuakkiaannik atuagassaqartinnissaannut piffisanngortoq, tamanna Kalaallit Nunaanni pissutsit pillugit allaanerusumik isiginnilersitsisinnaammat. Atuagarlu saqqummersinneqartussaq siulleq tassaavoq Kelly Berthelsenip oqaluttuliaaqqanik atuakkiaa Tarningup ilua.
Tamatuma kingorna Mathias Storchip Augo Lyngellu atuakkiaat aamma saqqummersinneqassapput, Daniel Charterillu aamma oqaatigaa siunissami saqqummersinneqartussat tassaajumaartut atuakkiat nutaarluinnaat.
Atuakkat franskisuunngortinneqartut Quebecimi Frankrigimilu saqqummersinneqassapput.
