Berthelsenip RG-mi sulisut nunatsinnut nuutsinniarai
Sisimiuni borgmesteriusimasup Royal Greenlandip Aalborgimi sulisuisa, 200-it nunatsinnut nuutsinneqarnerat namminiilivinnissamut iluaqutissartaqassasoraa.
- Tamatta suliffeqarfissuartut pigisarput RG qujanartumik ingerlalluarpoq, tamatsinnut iluaqutaalluartumik. Nunatsinnullu nuunneqaruni ingerlalluaannarnissaa aamma qularutiginngilara, Hermann Sermitsiamut oqarpoq.
Hermann Berthelsenip illoqarfigisaani, Sisimiuni suliffissuup pisortaata, Hans Larsen Olsenip isumassarsiaq akerlilerpaa. Taassuma politikerit Royal Greenlandimik ingerlatsinermut, akileraarusiinnginnermi 253 millionit koruuninik sinneqartooruteqartumut akuliuttariaqanngissorai.
AAMMA ATUARUK Royal Greenland nunatsinneersunik sulilersitsisariaqarpoq
- Sinneqartoorutillu assagut sarliaannanngilluaasarlugit ilungersorluta anguagut, soorunalumi Royal Greenland siulersuisoqarneratigut aammalu pikkorilluinnartunik avammut niuvernermut aammalu suliffeqarfissuarmik ingerlatsinermut misilittagalinnik qullersaqarneq annertuumik tunngaviliivoq, Hans Larsen Olsen Hermann Berthelsenimut akissuteqarluni allappoq.
- Taamaammat kissaatiginanngeqaaq tulluusimaarutigalugu suliffipput politikerit qinerneqarnissaq piinnarlugu pinnguarissagaat, Hans Larsen Olsen naggasiilluni allappoq.