Per Berthelsenip IA ersisaarinerarpaa

IA, Demokraatit Kattusseqatigiit Partiiallu nunatsinni siuttuunerini nunatsinni uranip oqallisigineqarnera unitsinneqarpoq, Per Berthelsenilu naapertorlugu Siumup siuttuulerneratigut piiaangilluinnarnissamillu isummersimanerup atorunnaarsinneqarnissaanik sulissuteqalermat aatsaat oqallisigineqaqqilersoq.

-Matumani innuttaasut sumiiffimmi pineqartumi amerlane-russuteqangaartut ineriartorfiusinnaasumi, suliffissaqarfiusussami isertitaqarfiusussamilu soquti-ginninnerminnik piiaanissamik aallartitsisoqarnissaannik qanittuminni takutitsigaluartut, uani IA illuinnaasiorluni urani taassumalu akugineqarnera pillugu ersisaarigaluaqisoq, Per Berthelsen tusagassiorfinnut nalunaaruteqarluni allappoq.

Berthelsenip erseqqissaatigaa piffissami mingutsitsinerup annertuumik sammineqarfiani atomip nukinganik nukissiorfiliornissamut soqutiginninneq annertusiartortoq. Tamannalu tunngavigalugu Kalaallit Nunaata nunap iluani pisussuutai pisariaqartinneqalissasut.

Nunatsinnili atomip nukinganik nukissiorfilioqarnissaa pineqanngilaq. Nunatsinni nukissiornitta 80%-ia erngup nukinganit pisuuvoq, tamannalu Per Berthelsenip allanngortittariaqarsorinngilaa. Siumup politikkikkut oqaaseqartartuata uranip ajortumik siunertaqarluni atornissaa minnerpaamilluunniit sulissutiginngilaa, pisussuutittali uumaatsut iluanaarutigisinnaanngornerat erseqqissaatigalugu, taamaattumillu maanna iliuuseqartariaqalersugut.