Per Berthelsen: Taamaammat Siumut qinerpara
Sermitsiap nittartagaani oqaaseqaatinut Demokraatini siulittaasuusimasup, tunuartitaasulli, akissutaani tamanna erserpoq. Politikerip Siumumut uteqqinnera pillugu isornartorsiuinerit ilaannut taanna akissutaavoq, Per Berthelsenimmi Siumukkunnut uteqqinnera aviisimik atuartartut arlallit tupigusuutigisorujussuuvaat.
-Suna peqqutigineriga arlaannassiluunniit eqqarsaatigisimavaa? Per Berthelsen aperaaq, nassuiaallunilu:
-Periarfissamut siullermut qaammatit sisamat affarlu atorpakka, kisianni taanna asuli piffissaajaatigaara. Tassani asuli oqaluunneqarpunga neriorsulussinnarneqarlungalu. Periarfissaq 1 utaqqiinnarsinnaannginnakku pingasunngornermi septembarip ulluisa 17-ianni naammassillugu kipivara, periarfissarlu 2 saallugu. Tassani inuttut qiimmaallannartumik pineqarpunga, tupaallaatigeqisannik.
-Taava isumaqatigisinnaavassinga isumaqatiginangaluunniit, kisianni tassa periarfissat taamaassimapput, periarfissarmi 1 asuli piffissaajaataasimavoq, Per Berthelsen allappoq, Siumullu tatiginninnera pillugu qutsavigalugu.
Periarfissaq 2 tassaasimavoq Siumut, tassungalumi uteqqippoq, kisiannili Inuit Ataqatigiinnik suleqateqarusunnini siusinnerusukkut eqqaanikuuvaa.