Per Berthelsen: Sanaartornermut sipaarneq kinguneqarnerlussanngilaq

Naalakkersuisut ukiuni missingersuusiorfiusuni sisamani tulliuttuni ukiumut 140 mio. kr.-inik sipaartarniarput. Assersuutigalugu sanaartugassanut aningaasaliissutit ukioq manna 70 mio. kr-inik sipaarfigineqarput. Tamannali sanaartornermut sunniuteqarujussuassanngitsoq, aningaasaqarnermut naalakkersuisoq, Per Berthelsen, isumaqarpoq.

- Sanasussaaleqiffioqimmat taamalillunilu aningaasaliissutit nungunngisaannarmata, aammalu sanaartornermi akit qaffakkiartuinnarmata, sanaartugassanik ikililerinikkut neriuppugut, akit qaffakkiartornerat pakkersimaarsinnaassallugu. Aammami puigussanngilarput, Nunatta karsiani 800 mio. kr-nit pallillugit suli uninngammata, sanaartugassanut aalajangiuteriikkanut sanasussaqannginneralu peqqutigalugu unittoqqasunut, ikilisarsinnaaniassagatsigit, Per Berthelsen oqarpoq.

Taarsiullugu kollegialiornissat sanaartornissaat ukiunik marlunnik siuartinneqarput. Naalakkersuisullu paasinninnerat naapertorlugu inissiat tamakkiisut amerlinerannik kinguneqassaaq. Kisianni nunatta karsia 306 mio. kr-inik amingartoortussanngorlugu aningaasanut inatsit aaqqissuuneqarpoq. Tamannali nunatta nappanneqarsinnaasumik aningaasaqarnissaanut ajoqutaassanngitsoq Per Berthelsenip qularutiginngilaa. - Ernumanngilluinnarpunga. Nunatta karsiani uninngasuutigut ernumananngilluinnarput. Uanilu amingartooruteqarneq taamaallaat peqquteqarpoq, uuliamik atuinitta apparsarnissaa anguniarlugu, erngup nukinganik innaallagissiutinut ukiuni tulliuttuni aningaasaliissagatta, aningaasaqarnermut naalakkersuisoq, Per Berthelsen oqarpoq.