Per Berthelsen kommunimi qinikkatut tunuassaaq

Per Berthelsen, aningaasaqarnermut nunanullu allanut naalakkersuisutut toqqarneqarnerminut atatillugu, Nuup Kommuniani, borgmesterip tulliata aappaatut kiisalu kommuninngortussami Kummuneqarfik Sermersuumi borgmesterip tulliatut siullertut tunuartariaqarluni oqarpoq.
Allattoq Elisa Isaksen
septembarip 27-at 2008 13:35

Kommunimi qinigaaffinnit taakkunannga tunuartariaqariarluni Per Berthelsen oqarpoq, taamaattorli Inatsisartunit sulinngiffeqarallarniarnani oqaatigalugu.

- Naalakkersuisunut ilaasortanngoraanni malittarisassat sakkortoorujussuupput. Tassa naalakkersuisunut ilaasortaajutigaluni soqutigisaqarfinni ingerlatsivinniluunniit allani saniatigut issiasoqaqqusaanngilaq.

- Taamaattumik annernaraluartumik pilliuteqassaanga. Tassa suliassaq unammillernartoq ingerlassinnaajumallugu, pilliuteqartariaqassaanga. Tamanna annerigaluarlugu akuerisariaqarpara. Kommunalbestyrelsiminngaanniit aamma Ikaarsaariarnermi ataatsimiititaliaminngaanniit sulinngiffeqarniarlunga qinnuteqassaanga. Taamaalillunga Ikaarsaariarnermi Ataatsimiititaliami siulittaasup tulliatut aamma kommunalbestyrelsimi borgmesterip tulliata aappaatut inissisimaffikka annaassavakka. Per Berthelsen oqarpoq.

Per Berthelsen naalakkersuisunut ilaasortassatut 14-init qinerneqarpoq, ataatsimit akerlerineqarluni, qulinillu taaseqataaffigineqarani.

Inatsisartuni akerliulluni taasisutuaasoq tassaavoq, Juliane Henningsen, Inuit Ataqatigiit. Taassuma naalakkersuisut siulittaasuata Hans Enoksenip toqqaanera aalassaatigeqaa.

- Kamappunga. Aningaasaqarnikkut nikingassuseq annertuujusoq nalunngilarput, maannalu naalakkersuisunut ilaasortamik nutaamik nikingassutsinut minnerulersitsiniarnermut tapersersoqatigiinnerulernissamullu akerliusumik suliniartumik peqalerpugut, Juliane Henningsen Sermitsiaq.gl-imut oqarpoq.