Per Berthelsen: Kinguartitsineq qunusaarutitut atorneqarpoq

Inatsisartut ukiaanerani ataatsimiinnerat pingasunngornermi naggataamik ingerlanneqalerpat pissanganartoqaalussinnaavoq.

Kommunit kattussuunnissaanut atatillugu eqqartuisoqalerpat, naalakkersuisooqatigiit isumaqatigiinnginnerat saqqummersinnaavoq.

Aamma naalakkersuisut siulittaasuata eqqunngitsuliorsimasutut pisuutinneqarnera saqqummiunneqassagunarluni.

Aningaasanut inatsisissap naammassineqarnissaa naggasiutigineqassaaq.

Aningaasanullu inatsissap oqaluuserineqarnissaata kingullerpaanngortinneqarnera, Demokraatinit iluaagineqarpoq, siulittaasuallu Per Berthelsen ima oqarpoq:

- Aningaasanut inatsisissap akuerineqarluni oqaluuserineqarnissaata kingullerpaanngortinneqarnera akuerisinnaanngilarput. Naalakkersuisooqatigiimmi akornanni isumaqatigiinngittoqalissagaluarpat, aningaasanut inatsit suli akuerineqanngitsoq, suliarpassuit kinguaattooriaannaammata, Per Berthelsen oqarpoq, nangillunilu: - utoqqatsissutitut qunusaarutitullu atorlugu isasoortussaagaluit pingitsoortinneqartarput.

Siumut sinnerlugu oqaaseqartinneqartartoq, Lars-Emil Johansen, oqarpoq, tamanna ilumuunngitsoq:

- Ileqquuvoq aningaasanut inatsisip kingullerpaanngortinneqartarnera, illuatungiliuttut taamatut takorluukkersaarsinnaapput, kisianni takorluukkersaarutaannaavoq piviusuunngitsoq. Amerlanerussuteqartut kissaateqarnerat malinneqaannarpoq, Lars-Emil Johansen oqarpoq.