Per Berthelsen: Juulip 8-ni peqataanianngilanga
-Maannakkut allakkiorpunga avammuttaaq nalunaarutigineqarumaartussamik, tassani erseqqissassavara immikkut ittumik ataatsimeersuarnissami peqataaniannginnera. Tassani erseqqilluinnartumik iluarsiiniarnissami kaammattorneqarlunga iluamillu tunuliaquserneqarlunga, taanna sioqqullugu kaammattorneqanngikkuma, Per Berthelsen nassuiaavoq.
Partiimi pilersissimasamini sorsoqataanissat pingaarnerunngila?
- Ilumut tassa tamannarpiaq pillugu piviusut pillugit avammut aammalu immikkoortortaqarfinnut allagarpassuarnik erseqqissaassuteqartuarpunga, soorunami aamma minnerunngitsumik qinersisartunut pissutsit piviusut qanoq ittuuneri pillugit erseqqissaajuarpunga. Per Berthelsen oqarpoq nanngillunilu:
-Peqataannginninnut patsisaalluinnarpoq immikkoortortaqarfiit qisuariartut ikinnerujussuat, tamanna Paamiuni, Nuummi Maniitsumilu immikkoortortaqarfinni ilaasortat soraarnerannik kinguneqarpoq, ilaatigut iluarineqaratik uparuartorneqarnermik kingorna allaat anisitsinernik malitsilinnik. Immikkoortortaqarfiit sinneri sumilluunnit tipisiuutaasinnaasumik tutsiunnikuunngllat, taamaammat julip arfineq pingajuat uannut ulluuvoq demokraatini pilersissimasama anersaavani ingerlaqqittussami peqataaginnassanerlunga, taamaanngippammi sunnguamilluunniit partiimi ingerlatsineq akuerisinnaanngisara peqataaffigisinnaajunnaassagakku. Taamaammat 8. juli tassaatippara uanga imminut demokraatitut pituttorsimaninnut killiusoq, Per Berthelsen oqarpoq, qinersiserpassuanilu pillugit ima nangippoq:
- qinersisikka taama amerlatigisut tatiginninnerlu taama angitigisoq politikkimik tatigineqarnera aallaavigalugu ingerlateqqinniarpara, qularnanngitsumillu aqqutissatuaavoq paartimik suleqatissarsiornissaq.
Per Berthelsen aamma oqarpoq Partii Demokraatit pilersissimasani aallartinnermisulli ilisarnartumik ingerlanissaa soqutigineqanngippat, taava aallartissimasani Demokraatit Partiiat piujunnaarsimassasoq.
