Per Berthelsen Demokraatit inatsisartuniititaanniit tunuarpoq
Per Berthelsen Demokraatit inatsisartuniititaanniit tunuarluni tusagassiuutinut nalunaarpoq, ungasinngitsukkullu partiimiit ilasortaajunnaavissalluni allalluni.
Allattoq Mads Lynge
juulip 29-at 2008 15:48
Taamaaliortinnanili siulersuisuni naapertuilluannginnerit partiillu aningaasaataanik atuinerluisimanermut tunngasut malersoqqaarniarpai.
Manna tikillugu Marie Fleischer Per Berthelsenilu Demokraatit inatsisartuniititaanni ilaasortaajunnaarmata ilaasortat pingasuinnanngorput.
Pissutsillu taamaalernerisa kingunerisassaasa ilagissavaat partiip marlunnik atorfeqartitsinertik akilertissinnaajunnaarnerat kiisalu Inatsisartut ataatsimiititaliaanni ilaasortaatitaqarnissartik piumasarisinnaajunnaarlugu.
Per Berthelsenip suleqatigisinnaasaminik periarfissani maanna ujartorniarpai, politikkikkut sulinini ingerlateqqissinnaajumallugu.
