Berthelsen akinut piumasaqaateqarpoq: Naalakkersuisut iliuuseqartariaqarput
Ipadit 3.000-it Villumfondenimit Kommuni Kujallermi Qeqqata Kommunianilu atuartunut maajimi tunissutigineqartut pillugit oqaluttuami ataaseq qularnanngilaq - qarasaasiaaqqat internetterutiginissaannut akiligassaq arlaata akilertariaqarpaa.
Politikerit nalunaarasuartaateqarnermut ilinniartitaanermullu akisussaasuusut iliuuseqartariaqalerput, borgmesteri suliniummi aqutsisuusoq oqarpoq.
- Tamatuma allanngortinneqarnissaa Naalakkersuisut soqutigisariaqarpaat, Qeqqata Kommuniani borgmesteri Hermann Berthelsen, radioaviisimut oqarpoq.
- Ipadit atorlugit aamma atuareernerup kingorna ilinniakkerisinnaasoqarnissaa ajornartorsiutaavoq, meerartagummi taamaaliornikkut suli silatunerulersinnaapput. Naalakkersuisullu isaannit isigalugu, ajornartorsiut tassanerpiamiippoq, nassuiaavoq.
Villumfondenip qarasaasiaaqqanik tunissuteqarnermini piumasaqaatigaa, meeqqat atuarfiup internettimut attavianut pituttugaanatik qarasaasiaaqqat atorlugit angerlarsimaffimminni ilinniakkerisinnaanissaat.
Akiligassalli taassuma akilerneqarnissaa illuatungeriinnut tamanut akisuunngorsinnaavoq. TELEPOST-illu atuarfimmut suliniummut immikkut ittumik akinik appaanissaanut inatsisiliorneq aporfigineqartoq, pisortaaneq Michael Binzer oqarpoq.
- Nunatsinni nalunaarasuartaateqarnermut inatsisiliornerup attaveqaatinut tunngatillugu politikkikkut iliuuseriniakkanut arlalinnut aporfiusarnera puigorneqaqqajaasarpoq.
Nalunaarasuartaateqarnermut peqqussut, Binzerip ulluinnarni malinniartariaqagaa allanngortinneqartariaqarpoq TELEPOST akinik appaasinnaasunngorlugu, Hermann Berthelsen isumaqarpoq.
Taamatut pisoqanngimmat Sisimiuni borgmesterip Ipaderpassuarnut qujaannartariaqarsinnaavoq.
Qeqqata Kommuniata siunnersuutigaa, atuartumut ataatsimut ukiumut 500 koruuninik TELEPOST-imut akiliisoqartassasoq.
Naalakkersuisullu tungaannit maanna iliuuseqartoqarnissaa piumasaqaatigaa.
- Suliniutitsinnut iluaqutaasussamik nalunaarummik suliaqarsinnaapput, aamma taamaaliornissaat naatsorsuutigaarput, Hermann Berthelsen oqarpoq.
Nick Nielsen, ilinniartitaanermut naalakkersuisoq aamma Steen Lynge, attaveqarnermut naalakkersuisoq, taamatut ittumik nalunaarusiortoqalernersoq oqaaseqartinniaraluaratsigit iluatsinngilarput.