Bernie Sandersip USA-mi qineqqusaarnini aallukkunnaamivaa
Bernie Sandersip USA-mi demokraatit sinnerlugit aappaagu præsidentissatut qineqqusaarnini aallukkunnaamivaa.
Sanders 78-nik ukioqartoq uummalliornini pissutigalugu Las Vegasimi napparsimmavimmi suliaritereerluni arfininngormat angerlarpoq.
Nakorsat sapaatit akunnerani kingullermi paasivaat senatori Sanders uummammi taqaasigut milittoorsimasoq.
Sandersilli qineqqusaarnermi peqataalluartuarsinnarumaarnissi erseqqissaatigaa.
- Suliatigut naammassinnissinnaasarnissannut nukissaqarnissara qulakkeerumallugu allaanerulaartumik periuseqalernissarput ilimagaarput, Sanders oqarpoq.
Sanders USA-mi præsidentimut aappaagu novemberimi qineqqusaartussat ukioqqortunersaraat. Unammillertiminut Elisabeth Warrenimut sanilliulluni piffissami kingullermi kinguariartorpoq.
Præsidentimut tullersortaasimasoq Joe Biden USA-mi demokraatit sinnerlugit qineqqusaartuni USA-mi naalagaaffiit amerlanerpaartaanni maannamut siuaqqanerpaavoq.
Bernie Sanders USA-mi demokraatit sinnerlugit præsidentimut 2016-imi qineqqusaaqataanermini Hillary Clintonimut ajorsarpoq.