Bernhardt Olsen (S): Takornarialermik ilinniarfik Ilulissanut nuunneqarli
Tikisinneqartartut ikilisinniarlugit Qaqortumi Niuernermi Ilinniarfimmi ilinniarneqarsinnaasup takornarialerinermut tunngasoq Ilulissanut nuunneqarnissaa siunnersuutigaa.
Bernhardt Olsen aamma oqarpoq Ilulissat takornariartitsinermi Qaqortumut naleqqiullugu periarfissagissaarnerusoq. Ilulissani angallatit takornarialerisartut 30-upput, allafeqarfiit takornarianik sullissisut arfineq-marluupput, hotelit pingasuupput, vandrehjemmeqarpoq allanillu unnuiffissaasinnaasunik arlalinnik peqarluni. Taakku saniatigut takornarianik qimussiussisinnaasut 30-t missaanniipput. Taamaattumik Ilulissani periarfissat taama amerlatigitillugit ilinniartut praktikkerfissaaleqisarnissaat ilimananngitsoq Bernhardt Olsen isumaqarpoq.
Takornarianik ilinniarfik ikinnerpaamik 50-inik ilinniartoqarsinnaasoq sananeqarnissaa, taakkununngalu kollegieliortoqarnissaanik aamma siunnersuuteqarpoq. Bernhardt Olsenip siunnersuutigaa Aningaasanut Inatsimmi aningaasaliiffigineqarsimasut nikisiteriffigineqarnerisigut ilinniarfiliortoqarlunilu kollegialiortoqarsinnaasoq.
- Takornarianik angallassisussat guidit ikinnerpaamik 30-t Danmarkiminngaanneersut aasakkut tikisinneqartarput, kangiamiullu tikittartut amerliartuinnarlutik. Taamaattumik nunatsinni innuttaasut takornarialerinermik sullissisunngornissaat anguneqassappat ilinniarsimasut amerlanerusut pissarsiarinissaat piffissanngorpoq, Bernhardt Olsen tunngavilersuivoq.