Berlinimi qarmarsuup uppitinneqarneranit ukiut 20-nngorput

Tysklandimi Berlinimi qarmarsuup uppitinneqarneranit ukiut 20-nngornerat ullumikkut nalliuttorsiutigineqassaaq. Novembarip qulingiluaat 1989 eqqaaniarlugu kiffaanngissuseqarnerup nalliuttorsiutigineqarnissaa pilersaarutaavoq.
Allattoq Elisa Isaksen
novembarip 09-at 2009 06:12

Nunani assigiinngitsuni qullersat naalakkersuisullu siuttui Tysklandimi illoqarfiit pingaarnersaanukaarranniarput. Tassani ataatsimoorlutik nalliuttorsiussavaat, Tysklandimi forbundkanslerip Angela Merkelip taasaa, "Tysklandip oqaluttuarisaanerani nutaanerusumi ulloq nuannernerpaaq".

Kiffaanngissuseqarnerup nalluttorsiutiginerata saniatigut eqqaassutissamik nappaasoqarniarpoq, Qarmarsuup ukiuni 28-ni atuunnerani, tassa 1961-imiit 1989-imut inuppassuit toqutaasimasut tamatumuuna eqqaassuserniarneqarlutik.

Angela Merkelip unnugu eqqaassutissaq Brandenburger Tor nunat iligisanit aallartitat, tassa USA-meersut, Tuluit Nunaanneersut Frankrigimeersut Ruslandimeersullu peqatigalugit ingerlaarfiginiarpaa. Brandenburger Tor Tyskit illoqarfiisa pingaarnersaannut naalagaaffiullu immikkoortinneqarneranut takussutissaavoq, tikeraallu 100.000-ilikkaat najuunnissaat naatsorsuutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq