- Kalaallit Nunaata siunissami namminiilivinnissamut taasisinnaanermut pisinnaatitaanerat pillugu oqallinneq Berlingske Tidenimi isumamik sangutitsilluni allaaserisami saqqummiunneqarpoq, Broberg ataasinngornermi unnukkut taama allappoq.Assi: Scanpix

Berlingske: Pele Broberg kukkusumik issuanngilarput

Berlingske Pele Brobergimik allaaserinninnermini isummanik sangutitsinngilaq. - Immiullugu apersornikuuarput, Berlingskep nunanut allanut aaqqissuisua oqarpoq.

Qallunaat aviisiata Pele Broberg pillugu allaaserisani sapaammi saqqummersippaa, pineqartorlu erngerluni politikkikkut aalassatsitsivoq.

Pele Brobergimmi nunatsinni namminiilivinnissamut kikkut taasisinnaatitaassanersut oqallisigineqartariaqartoq Berlingskemut oqaatigaa.

- Thailandimiut, Danmarkimeersut, tuluit, Frankrigimeersut, Spaniamiut, allalluunniit nunatsinni najugallit nunatta namminiilivinnissaanut taasititsinermi peqataanissamut pisinnaatitaaffeqanngitsut ersarippoq. Tassa naggueqatigiit inuit. Nuussimasutut qanoq misigisimaneq isumaqarnerlu taasinissap oqallisigineqarnissaani matumani pingaaruteqanngillat, Pele Broberg Berlingskemut oqarpoq.

AAMMA ATUARUK Pele Brobergip kikkut nunatsinni qinersisinnaatitaassanersut oqallisigineqartariaqarsoraa

Taamalu oqaaseqarnera politikkikkut aalassatsissutaavoq.

Naalakkersuisummi siulittaasuata nunanut allanut tunngasunut naalakkersuisuni sapaatiummat unnukkulli naqqissuuteqarfigereerpaa:

- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq, naqqiummi ilaatigut atuarneqarsinnaavoq, Múte B. Egede Pele Brobergimut naqqiissuteqarnermini allappoq.

Allamut saatitsisoqarneraasoq

Pele Brobergilli Berlingske apersorneqarnerminik allamut saatsitsiniaanerarlugu ataasinngornermi unnukkut oqaatigaa.

Tamanna Facebookimi quppernerminut allaatigaa.

- Kalaallit Nunaata siunissami namminiilivinnissamut taasisinnaanermut pisinnaatitaanerat pillugu oqallinneq Berlingske Tidenimi isumamik sangutitsilluni allaaserisami saqqummiunneqarpoq, tassanilu issuarneqarsimavunga oqarsimaneragaallunga inuiaat namminiilivinnissamut taasitinneqarnissaanni Inuit kisimik taaseqataasinnaasariaqartut. Taamatut issuarneqarneq kukkunerulluinnarpoq!

Pele Brobergimmi oqarnera naapertorlugu Berlingskemit tusagassiortoq Nuummi aggustimi apersuinerminik allamut sanngutitsisiniaasimavoq.

- Tassani oqaatigisara tassaavoq Inuit tassaasut inuit nunasiaataanermik nalaanneqarsimasut. Taamaattumilu tassunga atatillugu inuiaat kalaallit tassaasut namminiilivinnissamut pisinnaatitaasut. Inuiaat nunasiaataasimasut tamanna pisinnaatitaaffigigaat naalagaaffiit innuttanut pisussaaffiinit tamanna aallaaveqarpoq.

Berlingske eqqunngitsuuneraavoq 

Kisianni Berlingske Pele Brobergimik allaaserinninnermini isumannik allanngortiterisimanngilaq.

Taama Berlingskemi nunanut allanut aaqqissuisoq Birgitte Borup KNR-imut oqarpoq.

- Issuarneqarnera eqqortuuvoq. Issuarneqarneri eqqortuunissai qulakkeerniarlugu apersorneqarnera immiunniukuuarput, ilanngutassiarlu takisoorujussuullunilu peqqissaartumik suliaavoq, taanna tusagassiornermi tunngaviit sulinermi malittuaannakkagut atorlugit suliarineqarpoq, oqarpoq.

AAMMA ATUARUK Múte B. Egede Pele Brobergip oqaasiinut naqqiuteqartoq

Kisianni Pele Broberg facebookimi allappoq Berlingskemi isummani allanngorlugit saqqummiussisoqarsimasoq, aamma allappoq taamatut issuarneqarnini kukkunerulluinnartoq - taava illit eqqoriarsinnaaviuk sukkut Berlingske aamma Pele Broberg paatsooqatigiissimanersut?

- Pele Brobergip tunngavigisaa eqqarsaatigalugit aallartinnianngilanga. Berlingskemit tusagassiornermi peqqissaartumik torersumillu suliaqartoqartoq oqaatigisinnaavara. Tamannalu uani uannut taamaappoq, Birgitte Borup oqarpoq.

Birgitte Borupimmi oqarnera naapertorlugu Pele Brobergi apersorneqarami immiunneqarsimavoq eqqortumik issuarumallugu.

- Uani oqaloqatigiinnerup immiunneqarsimanera oqaatigissallugu uannut pingaaruteqarpoq. Eqqortumik issuarparput aamma tatiginartumik tunngavissaqartumillu sivisuumik apersorneqarneranit Pele Brobergip oqaatigisai isiginninnerilu saqqummiunneqarput, oqarpoq. 

AAMMA ATUARUK Brobergip assuarliornerata kingorna: Naleraq naalakkersuisuni ilaasortaaginnarusuppoq

KNR-imit Pele Broberg aamma oqaloqatigerusukkaluarparput, kisianni allattaataa ilisimatitsissutigivaa qanorluunniit apeqqutissaraluarutta Brobergip facebookimini quppernermini allaaserisani taamaallaat innersuussutigigaa.

Pele Broberg apererusussimagaluarparput allaaserisami isumaani suna allatut saqqummiunneqarsimanersoq, aamma tusagassiuutit pillugit aalajangiisartunut tunniussiniarluni isumaliuteqarnersoq aperusussimagaluarparput, taamatullu aamma Berlingskemit apersorneqarsimanini immiunneqarsimasoq qanoq oqaasissaqarfigineraa tusarusussimagaluarlutigu.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat