Benziinamik akitsuinissaq akerleraat

Inuit Ataqatigiit siulittaasuat Kuupik Kleist ima oqarpoq:

- Avatangiisit illersorniarlugit akitsuusersuisinnaaneq isumaqarpugut ajunngitsoq. Akitsuutilli pioreersut iluanni akitsuut tamanna nassaarineqarsinnaavoq, aamma akileraartarnikkut akitsuusersuinikkullu allannguisoqassappat, taava kissaatigaarput isertitakinnerit minnerusumik akileraartinneqartalissasut, taamaaliornikkut agguaassisoqarsinnaasoq, akileraartarnikkut akitsuusersuinikkullu innuttaasut nammagassinneqarnerat annertusinngikkaluarlugu, Kuupik Kleist oqarpoq.

Ikummatissat assigiinngitsut akiisa qaffakkiartornerat nunatsinni malugilerumaaripput Kuupik Kleistip ilamagaa, akillu apparsimaartinneqarnissaat pingaartinnerullugu.

Silap pissusaata allanngoriartorneranut atatillugu oqallinnermut tapertatut Siumukkut siunnersuusiorput, Inuit Ataqatigiinniillu tamanna iluarineqarpoq:

- Isumat taamaattut isumaqatiginartorujussuupput. Akitsuuseriaatitsitsinni nalinginnaasumik annertusiartortumillu avatangiisinik illersuinissaq soqutigalugu eqqarsartariaqalersusugut, Kuupik Kleist oqarpoq.

Anthon Frederiksenip, Kattusseqatigiit Partiianneersup benziinap akitsuuserneqarnissaanut siunnersuut akerlilerpaa:

- Pissutsinut piviusunut naapertuutinngilaq. Aalisarnermik inuussutissarsiuteqartunut namminersortunullu eqquinerlussinnaammat, Nioqqutissat allallu nunanut allanut naleqqiullugit akisuneroreerput, taamaattumik pissusissamisoortutut isiginngilarput benziinap solarillu akitsorneqarnissaat oqaluuserissallugu, Anthon Frederiksen oqarpoq. Benziinap akitsuuserneqarsinnaanissaa aningaasaqarnikkut ingerlatsineq pillugu nalunaarut 2008-moortoq pillugu Inatsisartuni ippassaq oqallittoqarmat Siumut taama oqariartuuteqarpoq, naalakkersuisoqatigisaasali Atassutip siunnersuut akerleraat.