Ben Shalmi: Ilinniartitaanerit sinerissap avataanut attuumassutillit Paamiuni katersorneqassapput
Imarsiornermik ilinniarfinnut tunngatillugu Paamiut qitiutinneqarnissaannik kaammattuisut imaaginnavissimapput, Sermersuumilu Inuussutissarsiornikkut Siunnersuisooqatigiit Paamiut imarsiornermik ilinniartitaanikkut qitiutinneqarnissaanik kaammattuuteqartut ilagisimavaat. Tamannami illoqarfimmut qanigisaanullu periarfissanik nutaanik ineriartortitsinermillu pilersitsisinnaammat.
- Nutaarsiassaq tusarfiunneqartoq nuannersoq iluatsillugu Imarsiornermik Ilinniarfimmik siunissaq pillugu oqaloqateqarnissamut atorusupparput. Suliniutit suut ilinniarfiup illoqarfiullu suleqatigiinnissaannik qulakkeerisinnaasut ilanngullugit. Sermersuumut nunattalu sinneranut iluaqutaasussamik sunniuteqaqataallutalu siumut isigisumik sulieqatigiinnissamut qilanaarpugut, Martin Ben Shalmi, Sermersuup Inuussutissarsiornikkut Siunnersuisoqatigiivini siulittaasoq oqarpoq.
Piiaavinni uuliarsiorfinnilu sulinermut ilinniartitaanerit ataatsimut katersorneqarnissaat toqqarneqarsimavoq, Martin Bel Sahlmilli tamanna kukkusumik aalajangersimanertut isigaa. Piiavinni sulineq uuliasiornerlu assigiissuteqanngillat. Piiaviit inissisimaffii ajunngillat, ilinniartitaanerillu uuliasiornermut tunngassuteqartut imaani sulinermik ilinniarfiit allat peqatigalugit ataatsimut katersorneqartuuppata pitsaassagaluarpoq.
-Uuliasiornermik suliffissuaqarneq pimoorussamik suleqatiginiarutsigu, taava aamma nammineerluta immitsinnut pilerinarninngorsartariaqassaagut. Uuliasiornerup iluani suliaqarfinni pisariaqartinneqartuni ilinniartitsisussanik ilinniartitsisoqartarnera nalunngilarput. Aaqqiissuussinerit ”Train the trainer”-imik taaguuteqartinneqartut, tassa ilinniartitsisussanik ilinniartsineq, aqqutigalugu taamaaliortarput, tamannalu atorluartariaqarparput, Martin Ben Shalmi knr.gl-imut oqarpoq.
Namminerli assigiinngitsutigut iliuuseqanngikkaanni uuliasioqatigiiffinnit ajunngisaarfigineqarnissaq anguneqarsinnaanngilaq. Kalaallit Nunaata avatangiisit, peqqinnissap isumannaallisaanerullu tungaatigut iliuuseqarusunnerminik takutitsippat ilinniarfissanillu isumagisaqarsinnaappat, taava uuliasioqatiiffiit siunissami ilinniartitaanikkut suleqatiginissaat pitsaalluinnarsinnaavoq.
-Ilinniartitaanerit Paamiunut katersortariaqarpagut. Ilinniarfeqarfissat pisariaqartinneqartut amerlanerit pigereerpagut, aamma pikkorissunik ilinniartitsisoqarpugut ilinniarteqqilaarnerisigut ilinniartitsinermi atorneqarsinnaasunik. Kiisalu aamma sinerissap avataani sulinissamut ilinniarfiit Paaminut katersorneqarnerisigut, uuliasiorneq aallartisarluarneqalerpat najukkami innuttaasut suliffissaqartinnissaannut periarfissat pitsaasuussapput, Martin Ben Shalmi nassuiaavoq.
