Bell 212 timmisartuussiinnassaaq
Kristian Jeremiassenip Siumumeersup illoqarfigisaminut Qasigiannguanut assartuussinikkut periarfissanik naammagittaalliuuteqarnerata kingorna, Angallannermut naalakkersuisoq Jens B. Frederiksen taama erseqqissaateqarpoq.
Kristian Jeremiassen isumaqarpoq qulimiguulik Bell-212 qulimiguulimmut S-61-imut taartigineqartoq kinguaattoorutaasaqattaarmat, angallassinissaminillu unitsitsiinnartarmat, atorsinnaanngitsoq. Taamaammat pitsanngorsaasoqarnissaa piumasaraa.
Jens B. Frederiksenilli §37 tunngavigalugu apeqquteqaammut akissuteqarluni paasissutissiissutigaa, qulimiguullip allaanerusumik taarserneqarnissaa pilersaarutigineqanngitsoq. Millioninik hundredenik arlalinnik tamanna akeqassaaq, aningaasallu taakku angallannerup iluani nassaarineqarsinnaanngillat.
- Angallanneq aningaasaliiffigineqaqqissappat aningaasat taakku susassaqarfinnit allanit pissarsiarineqartariaqassapput, naalakkersuisoq erseqqissaavoq, aningaasanullu inatsit isumaqatigiinniutigineqarmat aningaasanik amerlanerusunik kissaateqartoqarsimannginnera maluginiarlugu.
Kiffartuussinerup siornamut naleqqiullugu ukiormanna ajorseriarsimaneranik oqarneq aamma ilumuunnginnerarpaa. Siorna piffissamut tassungarpiaq naleqqiukkaanni qulimiguullip piffissaq eqqorlugu aallartarneri 2013-imi amerlanerupput.
