Belgiamiut puisit amii tuniniaqqujunnaarpaat

Belgiamiut inatsisartui puisit amiinik suliaqarsinnaaneq tuniniaasinnaanerlu sapaatip akunnerani kingullermi inatsisiliornikkut inerteqqutaatilerpaat. Tamannalu EU-p aalajangersagaanik, EU-traktat-imik unioqqutitsineruvoq, taamatut oqarpoq nunanut allanut naalakkersuisoq Josef Motzfeldt. Danskit nunanut allanut naalakkersuisuat Per Stig Møller saaffigineqarpoq piumaffigineqarlunilu Belgiamiut inatsisartui EU-p inatsisiliaanik unioqqutitsisimaneranik eqqartuussivilersuusseqqullugit.

Belgiamiut inatsisartuisa puisit amiinik inerteqquteqalersitsinerat, nunani EU-mi ilaasortanut allanut tuniluutilernissaa, Josef Motzfelt-ip ernummatigaa, taamaattumillu maannakkut nunatsinnit qanoq iliuuseqartoqarnissaa pisariaqarnerarlugu.

Nunatsinni naalakkersuisut Belgiamiut oqartusaasuinut ukiup affaata kingulliup ingerlanerani uppernarsarsimavaat nunatsinni puisit nungusaataanngitsumik piniarneqartarnerat.

Nunanut allanut naalakkersuisup Josef Motfeldt-ip danskit nunanut allanut ministeriat Per Stig Møller tallimanngorpat ataatsimeeqatigissavaa, Belgiamiullu inerteqqummik aalajangiinerannut eqqartuussivilersuussiniarneq tunniutissallugu.