Belgiami qimuttuitsut imminnut aportut

Qimuttuitsut ilaasartaatit marluk Bruxellesip Belgiamiittup qanittuani angallattoqaleruttornerani imminnut apormata inuit 25-t tikillugit ajunaarsimasut nalunaarutigineqarpoq.

Ajunaarneq pivoq Bruxellesip nalunaaqutaa malillugu qulingiluat qeqqartoq Bruxellesip kujataani kitaani illoqarfeeqqami 15 kilometerisut ungasitsigisumi qimuttuitsut unittarfiata eqqaani. Aporneq ima sakkortutigisimavoq qimuttuitsut aappaasa apukkatik allat qallersimallugit.

Maannakkorpiaq ajunaartut qassiuneri ilisimaneqanngillat. Illoqarfiup borgmesteriata oqarnera malillugu 20-t toqutaasimapput, Belgiamili tusagassiorfinnit arlalinnit ajunaartut 25-unerarneqarlutik. Inuit sisamat qimuttuitsuni kiggigussaasimapput arlallillu aqqunartiterujussuarlutik.

- Qimuttuitsut ataatsit kingornatungaat takusinnaavakka, annaassiniartorpassuuppullu, aatsaaginnannguarlu ilaasoq ataaseq assut aqqunartitersimagunartoq anninneqarpoq, ilaasullu qimuttuitsuniit annissorneqartuarlutik, ambulancit qatserisartullu biilii aamakku, timersortarfillu ikaneralannguamiittoq ajutoornermi sullivinngortinneqarsimalluni, ajunaarnermillu aniguisut aqqunartitersimanngitsut ikiorniarneqarlutik.

- Apornermut suna pissutaasimanersoq Belgiami qimuttuitsortitseqatigiit suli oqaatigisinnaanngilaat, kisiannili ukiup taamaalineranut naleqqiullugu ulloq naallugu aammalu ippassaq unnuarlu apisimavoq, belgiamiullu aperujussuartarnera sungiusimanagu, aputaajaanissaminnullu atortussaqaratik, tamannalu immaqa apornermut pissutaasut ilagisimassavaat.

Belgiami aviisi De Standaard najoqqutaralugu qimuttuitsut arlaannit uninnissamut qulleq kalerrisaarut takunngitsoorneqarsimasinnaavoq. Belgiami ullaap tungaani apilaarnera isikkivilutsitsisinnaassaaq, paasissutissalli tamakkua suli uppernarsarneqanngillat, DR taama nutaarsiassaqartitsivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat