Belgiami politikikkut ajornartoorfik ajortikkaluttuinnarpoq
Amerlasuullu aarleqqutigaat nunami inuit avissaartuutilersinnaanerat.
- Tv-mi immikkut aallakaatitsisoqartarpoq, flamskit politikeriisa ilaat oqarmat "nunaga sakkortuumik ilisimajunnaarsimavoq, Belgien toquvoq" neriuutaarunnerlu malugineqarsinnaavoq.
Oqaatsit killeqarfiat, flamskisut franskisullu oqaatsinuinnaq tunnganngitsoq pillugu oqaasipiluttoqaqaaq.
EU-p Nato-llu allaffeqarfii Europap ilaani nunaaqqami tassaniipput, taassumalu siunissaa pineqarpoq.
Belgiami qinersisoqarmalli ullut 120-t qaangiutereerput. Qinersinermi flamskit partiiat nunamik pingaartitsisoq, NVA ajugaavoq, partiillu siulittaasuata Bart De Waver-ip naalakkersuisunik pilersitsisoqarsinnaanngitsoq maanna kunngimut nalunaarutigaa.
Tamanna Kunngip Albertip isumaqatigiinninniartoqaqqinnissaanik piumasaqarneranik kinguneqarsinnaavoq imaluunniit qinersisoqaqqinneranik nunalluunniit avissaartuunneranik kinguneqarsinnaalluni.
Avannaani flamskisut oqaasillit kujataanilu franskisut oqaasillit isumaqatigiissutissarsisinnaajunnaarsimapput, maannamummi oqaluttuarisaanermi Belgia isumaqatigiissutinik paasiuminaatsunik atatinneqarsimagaluarpoq.
Flandernimi flamskisut oqaasillit namminersulernissamik piumasaqarnerat, akileraarutit inooqatigiinnermullu politikikkut nammineernerulernissamik piumasaqarnerat isumaqatigiinniarnerit ingerlaqqinnissaannut unitsitsisuupput. Vallonienimilu franskisut oqaasillit flamskisut oqaasillit piumasaannik tuninissaannut akissaqanngillat. Flamskisullu oqaasillit politikikkut siunnersuutaat kingulleq kujataani avinnissamut qinnuteqarnertut tiguneqarluni, DR taama ilanngutassiivoq.
