Beijingimi coronap tuniluuteqqinnerani tunillatsissimasut amerliartortut
Kinap illoqarfiisa pingaarnersaanni Beijingimi coronavirusimik tunillatsissimasut nutaat 31-it paasineqarput, taamaalillutillu Beijingimi ulluni kingullerni arfinillinni tunillatsissimasut 137-inngorlutik.
Tunillatsissimasut kingulliit paasineqarmata atuarfiit, timersortarfiit kulturileriffiillu matuneqarput, illoqarfissuullu Beijingip ilaanut coronavirusimik tunnillatsinnissamut navianaateqartunut angalaneq inerteqqutigineqalerluni.
Beijingip mittarfiani timmisartut tikittussat aallartussallu katillutik 1255-it ullumi pingasunngornermi taamaatinneqarput, timmisartuussinissaraluit 70 procentii taamaatinneqarlutik.
- Illoqarfiit pingaarnersaanni tuniluunneq ilungersunartorujussuuvoq, Beijingimi oqaaseqartartoq Xu Hejian tusagassiortunik marlunngornermi katersortitsinermi oqarpoq.
AAMMA ATUARUK WHO-p Beijingimi coronavirusip tuniluutileqqissimanera ernummatigigaa
Tamanna coronavirusip Beijingimi tuniluutileqqinneratut Naalagaaffiit Peqatigiit peqqissuunissaq pillugu suleqatigiiffiannit, WHO-mit, nalilerneqarpoq.
Inuppaaluit tunillatsissimasutut paasineqartut ilaat illoqarfissuarmi nerisassanik niuffaffiit ilaanniissimapput.
Kinami tamarmi coronavirusip tuniluukkunnaarneranik Kina nalunaaruteqareersorlu, Beijingimi tuniluunnerit paasineqarput.
Nunarsuarmi nunat arlaqartut matoqqanikuullutik ammaqqikkiartuaarneranni, Beijingimi coronavirusimik tunillatsissimasut paasineqarnerisigut nunarsuarmi tamarmi tuniluunnerup immikkoortuata aappaat aallartissimasinaanera ernumassutigineqarpoq.