Bea Petersen Qaarsunit nuukkusuttoq: Nilliasaat kalerrisaarut tusaasinnaanngilara
Naalakkersuisut Qaarsuni innuttaasunik ippassaq ataatsimeeqateqarput.
Nunaqarfik taanna Uummannap kitaatungaaniippoq.
Karrat Kangerluanni nuna sajulluni qaqqat nakkaassagaluarpata qanoq pisoqassagaluarnersoq Naalakkersuisunit saqqummiunneqarpoq.
Saqqummiussinermi Bea Petersenip illuata malissuarnit anguneqarsinnaanissaa paasinarsivoq. Taassumami illua sissap qulinnguaniippoq.
Taanna 67-inik ukioqarpoq tusaaniarnerminillu ajornartorsiorluni. Taamaattumik nunaqarfimmiit nuunniarluni aalajangerpoq.
- Manna nuanneraluarpoq najugaqarfigalugu, tassa allutut ajornaqaaq qimattariaqarpara illora pukkittunnguamiikkami.
- Uanga utoqqaliartorama ernumalaarpunga aappaatigut. Tassanngaannaq periataartoqarsinnaagami ulorianaramigooq. Sillimaniarnissannut illersortariaqarpunga.
Tusaaniarnerminik ajornartorsiorami kalerrisaarut oqartussanit nunaqarfimmi atorneqalersimasoq illumini isersimalluni tusaasinnaanngilaa. Silatiminili aatsaat tusaasinnaallugu.
Tassaarsuaqanngippat nuunnianngitsoq
Arne Møller, Nukissiorfimmi sulisoq qatserutaasivimmilu ittuugallartoq tupaqqavoq. Taanna nammineq pigisaminik illoqarpoq, qaqqallu annertunerpaartaa nakkaassagaluarpat illua malissuit angussavaat. Taamaakkaluartoq nunaqarfini qimannianngilaa.
- Pisoqavitsinnagu uanga maanngaanniit qimagunnianngilanga. Pissutigalugu illoqarama nammineq akilereernikuugami, aamma allamik akilersortakkamik allamik pissaguma ippinnarpallaassooq, Arne Møller oqarpoq.
Pisortat nuukkusuttunut inissanik attartortakkanik neqeroorniarput, taakkuli akeqanngikkaluarpataluunniit Arne Møllerip Qaarsut qimakkusunngeqaa.
Taassuma kalerrisaarut pisortanit atortussanngortinneqarsimasoq annilaangatingaa. Kalerrisaarummi nunaqarfiup nukissiorfianit sarfalersugaavoq, nukissiorfillu sissap qulinnguaniilluni.
Arne Møllerip kalerrisaarutip malissuarnit eqqorneqarsinnaanera ajutoorsinnaaneralu aarleqqutigaa. Nunaqarfimmi sarfaarussinnaavoq minnerunngitsumillu nilliasaat kalerrisaarut atorsinnaajunnaarsinnaalluni.
Assi: Qaarsuni nukissiorfik sissap qulinnguaniippoq.
Meeqqat aamma ernumasut
Nunaqarfeqataali alla, 28-inik ukiulik, pingasunik meeralik Nuka Kleist Korneliussen, Ilulissanut nuukkusulluni pisortanut saaffiginnereerpoq. Taakkumi najugaqartunik ataatsimeeqateqarnerminni nuukkusuttut saaffiginniffissaannik tunivaat.
- Meeqqakka eqqarsaatigalugit nuukkusuppunga toqqisisimanerussammata. Angajulleq toqqisisimannginnami. Ataatsimiisitsinermi peqataagami. Toqqissisimanngittukassaagami taakkua paasititsiniaasut naammassereernerisa kingorna nammineq aamma oqarami maaniiginnarusunnani, Nuka Kleist Korneliussen oqarpoq.
Mallit illorput angussanngilaat
Aalisartup piniartullu 60-inik ukiullip, Knud Zeebip pisortat paasissutissiinerat paasinarnerarlugu naammagisimaarpaa. Taanna nammineq pigisaminik illoqarpoq. Paasissutissiinermilu nunaqarfeqatiminit eqqissiallannarnerusumik tusarpoq.
- Uagut illorput inormagu uannut assorsuaq toqqissiallannarpoq. Taamannak misigisaqarnissaq kissaatiginanngikkaluaqigami. Annertoorsuarmik taamaattoqannginnissaa neriuutiginaqigami, Knud Zeeb oqarpoq, nangipporlu:
- Nuliaralu ernerpullu oqaloqatigiinnitsinni aalajangereerpugut tassa maaniiginnassalluta.
Qaqqaq sisooratarsinnaasoq pillugu Uummannami innuttaasut Naalakkersuisunit pingasoriarlutik aqagu ataatsimeeqatigineqassapput.
