BBC-p nunatsinni immiussaa soqutigineqangaatsiarsimasoq
"Silap pissusaata allanngoriartornera pillugu pitsaanerpaamik aallakaatitassiorsimasut" nersornaammik, People's Choice Awardimik, nersornaaserneqarnissaannut, Radiokkut TV-kullu internettimut atassusiisartut, peqatigiiffiat, AIB, nersornaasiivoq.
TV-qarfissuup BBC-p aallakaatittagaani isiginnaarneqarluartaqisumi, Hardtalkimi, aallakaatinneqarsimasut immikkuullarissut pingasut piukkunneqarput. Taakku tassaapput "Hardtalk on the road to Greenland", aallakaatitassiortup Stephen Sackurip Kuupik Kleist silap pissusaata allanngoriartornera pillugu aallakaatitassiani taakkunani oqaloqatigaa.
Sackurilu siusinnerusukkut oqarnikuuvoq, aallakaatitassiat taakku pingasut Hardtalkimi 2009-mi aallakaatinneqarsimasuni pitsaanerpaasut nammineq isumaqarluni:
- Uannut pingaaruteqartorujussuuvoq, silammi pissusaata allanngoriartornerata kingunerisinnaasai qulaajarneqartariaqartut isumaqarpunga. Aallakaatitassiorninnilu ilikkagaqarnissara pingaartippara nuannaralugulu, Stephen Sackur oqarpoq, nunarpullu ilikkagaqarfiginerarlugu.
- Kalaallit Nunaat pillugu ilisimasakka killeqaraluarput, silalli pissusaata allanngoriartornerata Kalaallit Nunaannut kingunerisinnaasai iluamik qulaajarneqarsimanngitsutut ipput, oqaluttuarinissaallu pingaartippara. Aap, silap pissusaata allanngoriartornera pillugu ilisimasaqangaatsiarpugut, Kalaallilli Nunaanninngaanniit isigalugu oqaluttualiornissaq pissanganartippara. Ajornartorsiutilli unammilligassallu piinnarnagit, suut periarfissanngorsimanersut aamma oqaluttuarineqartariaqarput. Aallakaatitassiat taamaammat uannut pingaaruteqartorujussuupput, tuluk tusagassiortoq nunatsinniinnerminni ataqatigiissaarisuminnit Katja Nyborgimit, apersorneqarnermini ippassaq unnukkut oqarpoq.
BBC-lli aallakaatitassiai nersornaaserneqanngillat, Stephen Sackurili immikkkut nersorniarneqarluni.
Sackur "International personality of the year"-imik taaguutilimmik nersorneqarpoq, tassa inuk malunnaatilittut nersorniarneqarami.
Nersornaasiinerit ippassaani unnukkut pipput.
