BBC Greta Thunberg pillugu nangeqattaartumik piviusuleraarusiorniartoq

Tuluit tv-qarfissuata, BBC-p,  svenskeq 17-inik ukiulik silap pissusiata allanngoriartornerata iliuuseqarfigineqarnissaanut sukataarutiginnittoq, Greta Thunberg pillugu nangeqattaartumik piviusulersaarusiorniarpoq.

BBC-p nittartakkamini tamanna allaaseraa.

AAMMA ATUARUK Trumpip Greta Thunberg naapikkusuvissorsimagaluaraa

Greta Thunbergip, nunani tamalaani angalanera, aqutsisunik politikerinillu naapitaqarnera BBC-p malinnaaviginiarpaa, 17-inillu ukiullip nunani tamalaani tusaamasaalernera pillugu nangeqattaartuliorniarlutik.

Silap pissusiata allanngoriartornerata sunniuteqaatai, immikkut ilisimasallit peqatigalugit taassuma saniatigut malinnaavigineqassaaq. BBC taama allaaserisaqarpoq.

- Gretap malinnaaviginissaa kiisalu nunarsuarmi tamarmi maligassiusuunerup tusaamaneqarnerpaanerullu qanoq inneranut takunnissinnaalluni periarfissarissaarnerujussuuvoq, tv-kkut isiginnaagassiortoq, Rob Liddell oqarpoq.