Bayernimi qimuttuitsut ajutoormata krani angisooq atorneqartariaqartoq

Qimuttuitsut inunnik ilaasoqartartup Tysklandip kujataani Bayernimi ajutoorneratigut minnerpaamik inuit pingasut suli qaqinneqanngillat 

- Suli inuppaaluit nassaarineqanngillat, politii taama oqarpoq.

Tysklandmi oqartussat nalunaarput, inuit 140-t maanna paasereersimaleritsikm minnerpaamillu sisamat toqupput, 40-llu missaat aqqunartitertut aqqunartitersimallutik, matumani meeqqat aamma ilaallutik. 

- Krani 120 tonsimik kivitsisinnaasoq ajunaarfiusumukaanneqarpoq, qimuttutsullu uppimmata qularnanngilaq arlalinnik suli eqqugaasoqarsimanissaa, politiit oqaaseqartartuat taama ullumi oqarpoq.

Erseqqissaatigaalu qimuttuitsup ajunaartup peernissaata tungaanut ullualuit suli ingerlasariaqassasut.

Qimuttuitsorujussuimmi marluk uppipput, qimuttuitsut ajutoormata, marloriarlugulu ullaap tungaani kiveriarneqartaraluarput oqimaangaarmata kivinneqarsinnaasimanngillat.

Ajutoornermut peqqutaasoq ilisimaneqanngilaq

Ajutoornermut suna peqqutaanersoq suli ilisimaneqanngilaq. Bayemsimili angallannikkut ministeri Christian Bernreiter radio stationimut BR-mut oqarpoq teknikkikkut ajutoorneq tamatumunnga peqqutaasimagunartoq.

Tysklandip forbundskansleriata Olaf Scholzip ajunaarneq pillugu oqaaseqarnermini oqaatigaa, Tysklandimi ukiorpassuit ingerlanerini qimuttuitsut ajunaarnerisa sakkortunerpaartaasa ilagigaat.

- Qanigisaasut tamaasa misiginneqatigaagut peqqissilluarnissaannillu kissaappagut, taanna tyskit TV-iatigut taama oqarpoq.

Qimuttuitsoq avannamut Oberaup tungaanut ingerlagaluarpoq Garmisch-Partenkirchenimilu ajutoorlutik, tassa Münchenip kujataani Østrigellu killeqarfianut ungasinngitsumi.

Annaassiniartorpassuillu maanna sulipput, ambulancerpassuit, qatserisartorpassuit aammalu helikopterit arllallit.