Batteriit tigooraavimmut tunniunneqartassapput
Upernaleqaaq, angallataatillillu umiatsialerilalutik ulluni makkunani ulappupput.
Batteriit aallartitsissutit, akkumulatorinik taaneqartartut, taarsersugassanut ilaapput.
Taarsiiniaraannilu batteriit kommunip eqqakkanik sullissiviani tigooraavimmut tunniunneqartassapput. Kommuni najugaqarfik tigooraaveqanngippat teknikeqarfik aqqutigalugu akkumulatorit sumut tunniunneqarsinnaanissaat apeqqutigineqarsinnaavoq.
Akkumulatorit tamakku aqerlortaqarput. Aqerloq tassaavoq saffiugassaq oqimaatsoq toqunartortalik, timimullu eqiteruttarami arrortikkuminaatsuulluni.
Aqerloq timimut sunniuteqapilussinnaavoq, pingaartumillu meeqqat eqqorneqarnerlussinnaallutik.
Meeqqat ilikkariartornerannut pissusiinullu aqerloq sunniuteqapiluttarpoq, ajoqusiisinnaallunilu.
Akkumulatorit aamma syreqartarmata amernik atisanillu uutitsisinnaapput, meeqqallu najortagaannut pinnguarfigisartagaannullu inissinneqarnissaat inerteqqussutigineqarluni.
