Basrami sakkortuumik akersuuttoqarpoq
Irakimi naalakkersuisut tamaani inatsisaatsuliornerit unitsinniarlugit sorsuttartut pissaaneqaqisut Mehdi-militsimeersut akiorniarsaraat. Basrami eqqaanilu inuit annilaangarrapput angerlarsimaffimminniillu anissaarlutik.
Illoqarfimmi sumiikkaluaraanniluunniit eqqarpaluttut tusaasassaapput arlalinnilu qernertumik pujortoqarluni. Naalagaaffiup sakkutuui illoqarfimmut isaapput sorsuttartoqatigiillu assigiinngitsut pinerlunniaqatigiillu akersuuteqatigalugit, saassusserujussuartoqarnissaalu aarlerigineqarmat aqqusinerni inunnik angalaartoqanngilaq. Akersuuttut pissaaneqarnersaat Mehdi-meersut sakkutuunit akiorneqarput. Akersuuteqatigiit assigiinngitsut imminnut saassuteqattaapput, Mehdimeersulli ukiup kingulliup affaani sakkutuunut saassussissaaraluartut akiornissaat pingaatinneqarneruvoq. Illoqarfiup ilarujussua akersuuteqatigiit assigiinngitsut pinerlunniaqatigiillu aquppaat. Napparsimavinniit nalunaarutigineqarpoq unnuap ullaallu ingerlanerani inuit sisamat toqutaasimasut ikilerneqarsimasullu arlallit napparsimavimmukaanneqarsimasut. Inuit aneqqusaajunnaarput pissutsillu najummassimanarseqalutik.
Uuliamik qalluineq ilaatigut peqqutigalugu Illoqarfiup Basrap eqqaa Irakimi aningaasarsiornikkut pingaaruteqaqimmat, naalagaaffiup sakkutuuisa sakkortusaarlutik illoqarfimmi pissaaneqarneq tiguniarsaraat. Irakimili naalakkersuisut uppisinneqarmata Basramiit anngiortumik uuliamik annissuisoqarpoq akiilu atorlugit akersuuteqatigiit imminnut pilersornikuugamik maanna assut pissaaneqalersimallutik.
