Basrami arnat nunani Killerni arnatulli atisalersorsimasut toqunneqartalerput
Ullaakkut suliartorniarlunga pisarnittuut ilulleqarlunga atequteqarlunga pinnersarsimallungalu, bussit utaqqillugit motorcykilertup sukkaqaluni aporiaraluarpaanga, ullorli taanna toqusussaasimanngilanga, motorcykilertormi apulerlungalu uppippoq. Motorcykilertoq qernertunik umeqarpoq qernertumillu, sakkulersorlutik akiuuttartoqatigiit atortagaannik, qallersaateqarpoq, oqanngikkaluartorlu kamannera malugisinnaavara. Taamanili nasartaateqartalerpunga pinnersassagaangamalu annikitsunnguamik pinnersartalerpunga. Arnaq Basrameersoq tuluit tusagassiorfiannut BBC-mut taamatut oqaluttuarpoq. Islamisiortut ingasaassiniat arnanik malersuisarnerannik, qunusaarisarnerannik toqutsisarnerannillu oqaluttuat ilagiinnarpaat. Basrami politit pisortaat oqarpoq ukioq manna juulimiit septembarip tungaanut arnat 42-t toqutaasimasut. Toqutaasunut ilaapput arnaq erninilu angerlarsimaffimminni toqutaasut, ingutsisut arnaq allasiorluni ernertaarsimanerarsimammassuk. Basrami pissutsit, Afghanistanimi talebanit arnanik qunutitsillutik aqutsisimanerannut assinguleriartorput. Arnaq motorcykilinik aporiarneqaraluartoq BBC-mut oqaluttuarpoq, kinguariarneqarujussualersoq. – Naluarput suniarnersut soorlu 1400-kkunni pissutsinut uterteqqinniarsarineraatigut. Inuit qunungaaramik kikkut toqutsisarnersut, arnanik pinnersarsimasunik kikkut ajortumeeriniartarnersut, kikkullu qarmani arnat sioorasaarneqareernerarlugit allattarnersut, oqaatigineqarusunngillat. – Arnat mianersoqquneqareerput, Guutillu tamanna nalunngilaa – taamatut ilaatigut qarmani allattoqarsimavoq.
