Baskerit Kalaallit Nunaat qissimigaarpaat

Spaniami nunap immikkoortortaata Baskerit nunaata eqqissisimasumik namminersulernissamut suliniuteqarnerminni Kalaallit Nunaat qissimigaarpaat. Taamaammat partiimit nutaamit Abertzale Venstremit sinniisit kalaallit Folketingimut ilaasortat marluk sapaatip-akunnerani uani ataatsimeeqatiginiarpaat.
Allattoq Carla Davidsen
decembarip 07-at 2011 07:38

Baskerit Nunaanni 1970-ikkunnili sakkuaattoqalerpoq, sakkutuullu sorsukkumatuut, ETA-kkut, inuit 800-nit amerlanerit toquppaat. Naalagaaffiilli Peqatigiit Baskerit Nunaanni eqqissinissaq anguniarlugu oktobarimi ataatsimeersuarput, eqqisseqatigiittoqarnissaanut arlalinnik siunnersuuteqartoqarluni.

Siunnersuutillu pitsaasut tusarneqarput. Akiuukkunnaarnissaq ETA-kkut oktobarip ulluisa 20-anni nalunaarutigaat, akerleriissuteqarnermut taarsiullugu politikkikkut oqaloqatigiinneq aallartinneqarluni.

Politikerillu Baskerit Nunaanneersut nuannarineqalerusullutik maanna tassa suliniuteqalerput, Spaniamiit qanoq ilillutik avissaarsinnaanerlutik paasiniarlugu. Kissaataallu Siumut sinnerlugu Folketingimut ilaasortamit, Doris Jakobsenimit, aamma Inuit Ataqatigiit sinnerlugit Folketingimut ilaasortamit, Sara Olsvigimit, tassa tigulluarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq