Baskerit ilaat toqunneqarpoq
Ilimagineqalerporlu namminersulerniat sakkulersortuisa suleqatigiiffiat ETA toqutsisuusimassasoq.
Spaniap avannarpasissuani Baskerit nunaanni illoqarfimmi Mondragonimi socialistit siuttorisimasaat 42nik ukiulik Isaias Carrasco nuliani panitsillu ullaap tungaa illuminnit anisimatsiartut aallaaneqarpoq, kingornalu napparsimmavimmi anerningerluni.
Spaniap ministeriunerata José Luis Rodriguez Zapaterop sapaatiuppat kommunenut qineqqusaarnissat taamaatitissimavai. ETA, Euskadi Ta Azkatasuna, europamiunit nunasiffigineqanngikkallarmalli nunagisaminni oqartussaalerumallutik sakkulerlutik akiuuttut toqutsinermut pisuutinniarneqarput. ETA 1960it ingerlaneranni kisermaassilluni naalagaasimasumut Francomut akerliusunit ilinniarnertuunit pilersinneqarpoq. 2004-mi Spaniap illoqarfiisa pingaarnersaanni Madridimi qimuttuitsut unittarfissuanni qaartartumeerinermi inuit 191it toqutaaneranni ETA pisuutinneqarpoq; taamani Spaniami ministeriunissarsiuleruttortut; kingusinnerusukkulli paasineqarpoq Muamaap oqaassissutaanik upperniaqqissaartut qaartartumeerisimasut. Kinguneraalu Spaniami socialistit inatsisartuni ajugaarujussuarnerat, siuttunngornerallu – ETAp pinngitsuutinneqarnera iluaqutsiullugu.
Spaniap avannarpasissua Frankrigillu kujasissua Baskerit nunatoqaraat. Baskerit ilisarisimaneqarput marngusamaartartutut. Europamiunit siullersaallutik 1600-kkunni sineriatsinni arfanniartalersimapput. Ullumikkullu qitigiarsuutitsinnut eqqaanartunik nipilersoriaaseqarput.
