Barroso nunatsinnut tikeraarumaarpoq
Nunanut allanut tunngasunut naalakkersuisoq Josef Motzfeldt Bruxellesimi ullumi ataatsimiippoq. EU kommissionimi siulittaasoq Jose Manuel Barroso ataatsimeeqatigineqarpoq, sammineqartunullu ilaapput aalisarneq pillugu isumaqatigiissut nutaaq, kiisalu suleqatigiinnissamut isumaqatigiissut nutaaq.
Ukiup ataatsip iluani isumaqatigiinniutissat taakku naammassereersimanissaat siunnerfigineqarpoq.
Kommissionimili siulittaasup nunatsinnut tikeraarnissaa aamma sammineqarsimavoq:
- Nunatsinnut tunngasunik suliassat aallartisarneqalersut Barrosop danskit kommisæriutitaannit Marianne Fischer Boelimit tusarsimavaa Kalaallit Nunaannit isumaliutigineqartoq Barroso nunatsinnut tikeraassasoq, erngerlunilu nunatsinnukarusulersimavoq, nunanut allanut tunngasunut naalakkersuisoq Josef Motzfeldt Bruxellesiminngaanniit oqarpoq.