Barroso aalisartunik ataatsimeeqateqarpoq

juunip 24-at 2007 15:10

Barroso, EU kommissionimi siulittaasuusoq neriuppoq ima sunniuteqartigisinnaassalluni allaat europami nunat allat nunatsinni aalisarnermik piniarnermillu inuuniuteqartut pinngortitamik inuuniuteqarsinnaasuarnissaat qulakkeersinnaassallugu.

José Manuel Barroso, nuliani Margarida ingiaqatigalugu, naalakkersuisut siulittaasuat Hans Enoksen, nulialu Aaliiaraq – danmarkimilu statsministeri Anders Fogh Rasmussen nulialu Anne-Mette Ilulissanut tikeqatigiipput, tikinnerminni erinarsoqatigiinnit Ilulissanilu borgmesterimit Anthon Frederiksenimit tikilluaqquneqarlutik.

Angalaqatigiit ilaatigut aalisartunik marlunnik ataatsimeeqateqarput, aalisariutersortut umiatsiaararsortullu atugarisaat, minnerunngitsumillu silap allanngoriartornerata kingunerisaata sunniutai pillugit paasissutissiiffigineqarlutik.

Ilulissat Kangianit aniasut annertuneruliinnanngillat aammali seqummakuunerullutik anianerusalersimapput, taamaasillutillu aalisartut aalisarnissaminnut periarfissaarullutik miligussaasalersimallutik aalisarsinnaajunnaartarlutik.

Qalerallit minnerulersimapput, ukiukkullu sikusarunnaarnerata qaleraleqarneq pitsaanerulersissimanngilaa. Qipoqqaallu sumi tamaani aalisartunut akorngutaalersimanerat aamma saqqummiunneqarpoq.

Qilalukkat qernertat qaleralittortaqisut qaleralikinnerulerneranut pisuutitaaginnaratik aamma qalerallit qimaasarnerannut pisooqataanerarneragaapput.

Silaannaq panertarnikooqisoq massakkut isugutanerulersimavoq, siallernerulersimallunilu, akerlianik aamma ukiukkut aputeqarpiartarunnaarnera issaqarunnaarneralu oqaluttuarineqarpoq. Tamakkualu aalisagaqarneq kisiat eqqorneq ajorpaat aammali takornariat qimusseriaraluartut aputissaqannginnerannut ajornartorsiortitsisarput.

Barroso oqarpoq paasisimallugu silaannaap allanngoriartornera nunatsinni innuttaasunut annertuumik sunniuteqartoq.

Aperigatsigulu nammineerluni upperineraa europamiut kalaallinut paasinninnerulernissaannut aqqutissiuisinnaanerluni ima akivoq:

- Soorunalimi europamiut paasinnissinnaapput, ingammik pitsutsit atorneqartut saqqummiussoraanni, tassami pinngortitaq eqqartussagaanni pissutsit ilumut atuuttut aallaaviginissaat pingaaruteqaqaaq, EU kommissionimi siulitaasoq Barroso KNR-imut oqarpoq.

Silaannaap allanngoriartorneranut Kalaallit Nunaat sunnerneqarnerpaajuvoq, inuillu maani pinngortitamik inuuniuteqartuugamik pinngortitap allanngoriartorneranit sunnerneqarnerpaajusussaapput, Barroso ilaatigut oqarpoq.

Ilulissani aalisartut peqatigiiffianni siulittaasoq Peter Olsen aperaarput Barrosomik oqaloqateqarnertik qanoq neriuuteqarfigineraa ima akivoq:

Peter Olsen:

- Neriussaanga isumaqatiginniartarnernut nunatsinninngaaniit aallartitaasunut iluaqutaalaarumaartoq.

Peter Olsenip aamma neriuutigaa nunatsinni puisinniartarnermut aammalumi siunissami nunatta arfattassinneqartarneranut Barrosomik oqaloqateqarnertik iluaqutaajumaartoq.

EU nunattalu akunneranni ataatsimiinneq pisortatigoortumik aqagu ullaakkut ingerlanneqartussaavoq.